Одлуките за потенцијални украински територијални отстапки можат да ги донесат само народот на Украина и само откако ќе бидат воспоставени силни безбедносни гаранции, кои треба да вклучуваат мултинационални сили предводени од Европа, изјавија европските лидери во заедничка изјава по состанокот во Берлин во понеделник.
Изјавата на десетте европски лидери и претседателката на Европската комисија, Урсула фон дер Лајен, уследи по состанокот во Берлин каде што ги поддржаа мировните преговори меѓу американските и украинските претставници со цел да се стави крај на речиси четиригодишната војна.
Тие нагласија во изјавата дека Украина треба да има вооружена сила од околу 800.000 луѓе за да може да ги одврати потенцијалните напаѓачи.
Дополнително, Европа треба да координира „мултинационална сила за Украина“ во која ќе учествуваат земји кои сакаат да го сторат тоа, со поддршка на Соединетите Американски Држави.
„Ова ќе помогне во обновата на украинските сили, ќе обезбеди украинско небо и море и ќе вклучува операции во Украина“, се вели во соопштението.
Безбедносните гаранции би вклучувале и механизам за следење на прекинот на огнот предводен од САД за да се обезбеди рано предупредување за можен напад и да се одговори на прекршувања на прекинот на огнот.
„Одлуките за територијата се на народот на Украина, откако ефикасно ќе се воспостават силни безбедносни гаранции“, рекоа европските лидери.
Украинскиот претседател Володимир Зеленски исто така беше во Берлин, а за време на викендот разговараше со американскиот претставник Стив Виткоф и зетот на американскиот претседател Доналд Трамп, Џаред Кушнер.
Неименуван американски функционер им рече на новинарите по состанокот дека, според договорот дискутиран во Берлин, Украина ќе добие безбедносни гаранции слични на Член 5 од НАТО, според кој нападот врз една членка се смета за напад врз целата Алијанса.
Тој исто така рече дека американските мировни преговарачи ѝ кажале на Украина дека мора да се согласи да ги повлече своите сили од источен Донецк како дел од секој договор за ставање крај на речиси четиригодишната војна.
Нарекувајќи ги територијалните отстапки „болни“, Зеленски им рече на новинарите: „Да бидам искрен, сè уште сме на спротивставени позиции“. Сепак, тој додаде дека верува оти американските преговарачи ќе помогнат да се најде компромис.
„Не мислам дека САД бараат нешто“, рече Зеленски. „Нè гледам како стратешки партнери, па затоа би рекол дека она што го слушнавме во врска со територијата се барања на Руската Федерација“.
Русија го анектираше источниот регион Донбас на Украина, кој ги вклучува Донецк и Луганск, и три други региони, вклучувајќи го и Крим, што Киев и неговите европски сојузници го сметаат за неприфатливо. Руските сили не ја контролираат целосно територијата што ја бара Москва, вклучително и околу една петтина од Донецк.
Слични новости
САД: Конгресот усвои сеопфатен закон за одбрана што вклучува поддршка за Украина и Европа
Американскиот Сенат во среда со огромно мнозинство гласаше за усвојување закон за одбрана од 901 милијарда долари што вклучува поддршка и за Украина и за Европа, испраќајќи го до Белата куќа, која рече дека претседателот Доналд Трамп ќе го потпише
Зеленски до ЕУ: Исористете ги замрзнатите средства за да го задушите апетитот на Русија за војна
Украинскиот претседател Володимир Зеленски во средата ги повика сојузниците на Украина да му дадат поддршка на Киев и да ѝ покажат на Русија дека војната е „бесмислена“, пред клучниот самит на Европската унија на кој треба да се дискутира за замрзнатите средства на Русија
Путин: Русија ќе ги постигне своите воени цели дипломатски или воено
Претседателот Владимир Путин изјави во средата дека Русија ќе ги постигне своите цели во Украина или преку дипломатски или воени средства и дека ќе се стреми да прошири „безбедносна тампон зона“ во таа земја