Бројот на жртвите во пожарот во Хонг Конг се искачи на 128, околу 200 ичезнати

Комплексот, во кој живеат повеќе од 4.600 луѓе, бил обвиен со бамбусови скелиња и зелени заштитни мрежи за фасадно реновирање.

Полицијата соопшти дека уапсила тројца службеници на градежна компанија под сомнение за убиство од небрежност, бидејќи биле користени небезбедни материјали, вклучувајќи запаливи полистиренски плочи што ги блокирале прозорците.

Додека пожарникарите се бореа со пожарот во петокот и ги гаснеа зградите што сè уште тлееја, семејствата имаа мачна задача да пребаруваат низ фотографиите од мртвите направени од спасувачите.

Десетици филипински домашни помошнички загинаа во катастрофата, а 19 сè уште се водат како исчезнати, рече Едвина Антонио, раководителка на засолништето за мигранти „Bethune House“.

Индонезискиот конзулат соопшти дека две од починатите индонезиски државјанки работеле и како слугинки. Хонгконг има околу 368.000 домашни помошнички, претежно жени од посиромашните азиски земји кои живеат со своите работодавци.

Станува збор за најсмртоносниот пожар во Хонгконг од 1948 година, кога 176 лица загинаа во пожар во магацин.

Компаниите што ја покриле надворешноста на зградите со запаливи материјали, како и владата и градежниот сектор, беа обвинети за пожарот.

Полицијата уапси двајца директори и еден инженерски консултант од „Prestige Construction“, за која владата рече дека го одржувала Ванг Фук Курт повеќе од една година.

„Имаме причина да веруваме дека одговорната компанија била крајно небрежна, што довело до несреќата и неконтролираното ширење на пожарот, што пак резултирало со големи жртви“, изјави во четвртокот вечерта полицискиот началник Ајлин Чунг.

Полицијата запленила голем број документи, вклучувајќи список на вработени, 14 компјутери и три мобилни телефони при претресот на канцелариите на компанијата, додаде владата.

Канцеларијата за планирање на градот споменува постепено укинување на употребата на бамбусовите скелиња и нивна замаена со метални поради безбедноста во случаи како оваа трагедија.

Хонгконшкиот челник, Џон Ли, изјави дека владата ќе формира фонд вреден околу 33,2 милиони евра за помош на жителите, а некои од најголемите кинески компании најавија донации.

Втората ноќ по избувнувањето на пожарот, десетици евакуирани лица спиеја на душеци во блискиот трговски центар, а многумина рекоа дека местата во официјалните центри за евакуација треба да бидат резервирани за оние на кои им е најпотребна.

Луѓе, од постари лица до ученици, се завиткаа во ќебиња и се згрчија во шатори пред ресторани и продавници додека волонтерите делеа грицки и залихи, известуваат медиумите

Хонгконг, еден од најгусто населените градови во светот со околу 8 милиони жители, е преполн со висококатници. Екстремно високите цени на недвижностите долго време се извор на социјално незадоволство, а аналитичарите велат дека трагедијата би можела да поттикне незадоволство кон властите и покрај напорите за заострување на политичката контрола.