Советот за безбедност на Обединетите нации усвои резолуција со која се одобрува планот на американскиот претседател Доналд Трамп за прекин на војната во Појасот Газа, што вклучува испраќање меѓународни сили за воспоставување стабилност во палестинската енклава.
Израел и Хамас минатиот месец се согласија со првата фаза од планот на Трамп за Газа, што вклучуваше прекин на огнот и ослободување на заложниците, но резолуцијата на ОН се смета за витална за легитимирање на преодната администрација.
Текстот на резолуцијата вели дека земјите-членки можат да испратат свои сили во таканаречениот „Одбор за мир“, кој треба да биде преодна администрација што ќе ја надгледува реконструкцијата и економското закрепнување на Газа. Исто така, според усвоената резолуција, меѓународните сили за стабилизација ќе пристигнат во Газа за да го обезбедат процесот на демилитаризација на енклавата, што вклучува уништување на воената инфраструктура.
Русија, која претходно се закани со вето поради отфрлањето на текстот на нејзината резолуција која се разликуваше во конкретното споменување на палестинска држава, се воздржа од гласањето. Покрај Русија, Кина исто така се воздржа, додека другите 13 земји-членки беа „за“.
Палестинската самоуправа го поддржа текстот на резолуцијата, во кој се наведува дека „конечно ќе се создадат услови за кредибилен пат кон палестинско самоопределување и државност“ откако ќе ја унапредат програмата за реформи и реконструкција на Газа.
Како додаток на резолуцијата, беше усвоен и комплетниот мировен план на Трамп од 20 точки.
„САД ќе воспостават дијалог меѓу Израел и Палестина за да се договорат за мирен и просперитетен соживот“, се вели во американскиот план.
Под притисок од десницата во неговата влада, израелскиот премиер Бенјамин Нетанјаху изјави дека е против палестинска држава и дека Газа ќе биде демилитаризирана „со арно или со лошо“.
Хамас сè уште одбива да се разоружа и се спротивставува на таквата резолуција бидејќи ја смета за опасен чекор кон воведување странска администрација на територијата на Газа и дека резолуцијата на тој начин ги фаворизира израелските интереси.
Слични новости
Трамп ја изостави Северна Кореја во својата безбедносна стратегија, можно обновување на дипломатијата
Новиот план на американскиот претседател Доналд Трамп за глобална безбедност повеќе не вклучува денуклеаризација на Северна Кореја, што ги поттикнува шпекулациите дека Вашингтон се стреми да ги зголеми шансите за дипломатски напредок со Пјонгјанг во 2026 година
Маск ја спореди ЕУ со нацистите, X го затвори рекламниот профил на ЕК
Два дена откако Европската унија изрече голема казна на платформата X, социјалната мрежа ја затвори својата рекламна сметка на Европската комисија, а сопственикот Илон Маск ја спореди Унијата со нацистичка Германија
Нетанјаху: Израел ќе остане во тампон-зоната во јужна Сирија
Израел има намера да остане во тампон-зоната во јужна Сирија, изјави премиерот Бенјамин Нетанјаху на состанокот со израелските амбасадори, според извештаите на локалните медиуми