Американскиот претседател Доналд Трамп изјави дека рускиот претседател Владимир Путин треба да ја заврши војната во Украина, наместо да тестира нуклеарни ракети, додавајќи дека САД имаат нуклеарна подморница стационирана покрај рускиот брег.
Во неделата, Путин изјави дека Русија успешно ја тестирала својата крстосувачка ракета со нуклеарен погон „Буревестник“, оружје за кое Москва вели дека може да пробие секој одбранбен штит, и најави негово распоредување.
Запрашан на летот на „Air Force One“ за тестот на ракетата 9M730 „Буревестник“ – позната во НАТО како SSC-X-9 Skyfall, за која Москва тврди дека прелетала 14.000 км, Трамп рече дека САД немаат потреба да летаат толку далеку бидејќи имаат нуклеарна подморница покрај брегот на Русија.
„Тие знаат дека имаме нуклеарна подморница, најголемата во светот, веднаш до нивниот брег, па мислам, не мора да одиме 14.000 км“, им рече Трамп на новинарите, според аудио-снимка објавена од Белата куќа.
Трамп додаде дека е несоодветно Путин да објавува ракетни тестови додека војната во Украина продолжува.
„Тој треба да ја заврши војната – војна што требаше да трае една недела, а сега е во својата четврта година. Тој треба да го прави тоа, наместо да тестира ракети“, рече тој.
Кремљ одговори на коментарите на Трамп во понеделникот велејќи дека Русија дејствува во свои интереси за национална безбедност. Портпаролот на Кремљ, Дмитриј Песков, рече дека нема ништо во ракетниот тест „Буревестник“ што треба да ги затегне односите со Вашингтон.
Трамп постојано повторува дека сака да ја заврши војната во Украина, најсмртоносната во Европа од Втората светска војна, иако рече дека наоѓањето мир е потешко од постигнувањето прекин на огнот во Газа или прекинувањето на конфликтот меѓу Индија и Пакистан.
Ракетата „Буревестник“ првпат беше најавена во 2018 година, а Путин ја прикажа како одговор на обидите на САД да изградат систем за ракетна одбрана и да ја прошират НАТО алијансата.
„Тие не си играат со нас, а ниту ние си играме со нив“, рече Трамп, додавајќи дека САД постојано ги тестираат своите ракети.
Агенцијата Reuters објави на 25 октомври дека администрацијата на Трамп подготвува дополнителни санкции врз клучните сектори на руската економија ако Путин продолжи да го одложува завршувањето на војната во Украина. Запрашан за можни санкции, Трамп одговори отсечно: „Ќе дознаете“.
Слични новости
Макрон по примерот на Трамп ѝ се закани со царини на Кина
Францускиот претседател Емануел Макрон изјави дека му се заканил на Пекинг со царини за време на посетата на Кина доколку не преземе мерки насочени кон намалување на растечкиот трговски суфицит со Европската унија
Мировниот договор за Украина е многу блиску, вели американскиот претставник Келог
Претставникот на американскиот претседател Доналд Трамп за Украина изјави дека договорот за завршување на војната во Украина е „многу блиску“ и дека сега зависи од решавањето на две главни отворени прашања – иднината на украинскиот регион Донбас и нуклеарната централа Запорожје
Кинески авиони насочиле воен радар кон јапонски авиони
Јапонија во неделата соопшти дека кинеските борбени авиони насочиле радар за контрола на оган кон јапонски воени авиони во два „опасни“ инциденти во близина на островската група Окинава во Јапонија, тврдење што Пекинг го негираше