Светло-мајсторот Петар Богоевски, кој со својот децениски ангажман работејќи со своите колеги директори на фотографија и камермани придонел во визуелизацијата на режисерските замисли, е годинашен добитник на наградата Златен објектив, соопшти Кинотеката.
Ова признание Кинотеката го доделува на филмски автори и културни работници кои преку својот професионален ангажман придонеле во создавањето, развојот, промовирањето и популаризацијата на македонската кинематографија. Свеченото доделување ќе се одржи на 29 април, во 12 часот во Кинотеката.
Богоевски (73) професионално се посветил на филмот во 1970-тите години, најпрвин како светло-мајстор во Македонската телевизија, за веќе во 1976 да се приклучи на екипата во „Вардар филм“ кадешто го минува сиот свој работен век, инволвиран во проекти од секакви филмски родови и жанрови. Работел речиси на сите играни филмови снимени од 1980 до 2010, со Ценевски, Гапо, Столе Попов, Манчевски, Црвенковски, Османли, Митревски, Митриќески, Блажевски, Ристески и други (од „Оловната бригада“ и „Време, води“ (1980) до „Балканкан“ и „Илузија“ (2004), „Контакт“ (2005) и „Тајната книга“ (2006)), како и на голем број документарни и краткометражни играни филмови.
Досегашни добитници на ова признание беа режисерите Столе Попов, Бранко Гапо, Трајче Попов, Кирил Ценевски, Коле Ангеловки, Мето Петровски и Коле Манев, тонскиот снимател Глигор Паковски, аниматорите Дарко Марковиќ и Тонкица Митревска, директорите на фотографија Драган Салковски, Љубе Петковски и Благоја Дрнков, филмскиот работник Коста Крпач, продуцентот Панта Мижимаков, филмските критичари Илинденка Петрушева и Благоја Куноски-Доре, монтажерите Димитар Грбевски, Олга Лукова-Дончиќ и Спасе Тасески, костимографите Елена Дончева и Зорка Тодорова-Младеновиќ, како и композиторот Љупчо Константинов.
Слични новости
Соопштени имињата на музичарите кои ќе влезат во Рок енд Рол куќата на славните во 2025
Станува збор за Бед Компани, Чаби Чекер, Џо Кокер, Синди Лопер, Ауткаст, Саундгарден и Вајт Страјпс. Од номинираните кои годинава не успејаа да се најдат во Куќата на славните се Мараја Кери, Били Ајдол, Џој Дивижн/Њу Ордер, Мана, Оејзис и Фиш.
Френсис Форд Копола добитник на наградата за животно дело АФИ
Шесткратниот Оскаровец Копола е 50 добитник на наградата АФИ, која означува најголема чест за филмска кариера во Америка. Копола има освоено шест Оскари вклучувајќи и за најдобра режија во 1975 за „Кум 2“, кој исто така ги освои Оскарите и за надобар филм и најдобро сценарио.
Одбележани 73 години од раѓањето на Горан Стефановски
Кај спомен-клупата во Дебар Маало посветена на Горан Стефановски денеска се одржа настан „Горан е тука“ по повод 73 години од раѓањето на познатиот драмски автор.