Цените на акциите на светските берзи драстично паднаа минатата седмица, бидејќи инвеститорите стравуваат од ескалација на трговската војна, откако Вашингтон објави царини за увоз на автомобили, а голем број земји се заканија со контрамерки.
На Волстрит, Dow Jones минатата седмица се лизна за речиси 1 отсто, на 41.583 поени, додека S&P 500 потона за 1,5 отсто, на 5.580 поени, а индексот Nasdaq падна за 2,6 отсто, на 17.322 поени.
Пазарите се под притисок од вторникот, кога американскиот претседател Доналд Трамп најави воведување царини од 25 отсто на почетокот од април за увоз на сите автомобили што не се произведени во САД. Додека Трамп тврди дека тоа во голема мера ќе ја поттикне домашната автомобилска индустрија, инвеститорите не се целосно убедени, а цените на акциите во американскиот автомобилски сектор драстично паднаа. Остро паднаа и цените на акциите на европските, јапонските и јужнокорејските производители на автомобили.
Инвеститорите се нервозни и затоа што следната седмица Трамп ќе претстави план за воведување реципрочни царини за увоз од сите земји кои наплаќаат царини за увоз на американски производи. Промената на трговската политика на Трамп создаде несигурност на берзите, бидејќи инвеститорите стравуваат од прекини во синџирите на снабдување, забавување на економскиот раст и зголемување на инфлацијата.
Покрај тоа, инвеститорите стравуваат од ескалација на царинската војна, бидејќи многу земји најавија противмерки поради американските царини.
„Инвеститорите се многу загрижени за политиките на Трамп. Дури и повеќе од политиките, тие се загрижени за постојаните промени. Тоа ги прави навистина нервозни за носење долгорочни инвестициски одлуки, без разлика дали зборуваме за компании или инвеститори”, вели Џед Елербрук, портфолио менаџер во „Argent Capital“.
Поради ова, цените на акциите на најголемата светска берза паѓаат со седмици. Индексот S&P 500 сега е за околу 9 отсто понизок од рекордното ниво од 19-ти февруари. Nasdaq, од друга страна, падна за речиси 14 отсто од рекордното високо ниво и со денови е на територијата на корекција. Поради ова, и S&P 500 и Nasdaq се на пат да го завршат првиот квартал од оваа година во минус.
Поради царинската војна, цените на акциите минатата седмица паднаа и на повеќето европски берзи. Иако лондонскиот FTSE индекс порасна за 0,1 отсто на 8.658 поени, франкфуртски DAX потона за 1,9 отсто на 22.461 поен, а париски CAC за 1,6 отсто на 7.916 поени.
Слични новости
Германските гиганти со значително зголемена продажбата на автомобили во САД во првиот квартал
САД беа главниот извозен пазар за автомобили од ЕУ минатата година, со испораки во вредност од 38,9 милијарди евра, објави во вторникот европската канцеларија за статистика
Цените на нафтата над 74 долари
Цените на нафтата се стабилизираа над нивото од 74 долари за барел на меѓународните пазари во средата додека трговците го чекаа објавувањето на новите царини во САД, за кои стравуваат дека може да предизвика ескалација на трговската војна и да ја намалат глобалната економија и побарувачката на енергенси
Новиот погон го катапултираше американскиот извоз на течен гас
Извозот на течен природен гас (LNG) од САД нагло се зголеми во март благодарение на новата фабрика на „Venture Global“, покажаа прелиминарните податоци на LSEG, при што повеќето пратки повторно се испорачуваат во Европа