Волстрит остро падна по објавата на царините за автомобили

Трамп ги најави овие давачки на почетокот на годината, но инвеститорите се надеваа дека тој ќе се откаже од нив или дека Вашингтон во меѓувреме ќе постигне некаков договор со своите трговски партнери. Сепак, ништо од ова не се случи, па Трамп на прес-конференција рече дека од 2 април ќе воведе царини од 25 отсто за сите возила што не се произведени во САД.

Покрај автомобилскиот сектор, вчера под притисок беа и акциите на технолошките компании. Од 11 најважни сектори на индексот S&P 500, цените на акциите паднаа во шест, со најголем пад, над 2 отсто, во секторите за комуникации и информатичка технологија. Меѓу најголемите губитници беа акциите на производителот на чипови „Nvidia“, со пад на цената од речиси 6 отсто и „Tesla“, со пад од околу 5,5 отсто.

Сега пазарите очекуваат реакција од земјите кои најмногу ќе бидат погодени од новите царини, но и нови одлуки од Вашингтон, со оглед на тоа што Трамп неодамна најави дека од 2 април ќе воведе реципрочни царини за увозот од сите земји кои наплаќаат царини за увоз на американски производи.

„Пазарите ја мразат оваа несигурност околу тарифите, особено што се однесуваат на автомобилската индустрија. Овие тарифи може да имаат големо негативно влијание врз економијата“, вели Џејми Кокс, партнер во „Harris Financial Group“.

Поради царинската војна, аналитичарите на „Barclays“ вчера го намалија целното ниво за индексот S&P 500 на 5.900 поени, од претходните 6.600 поени. По вчерашниот пад, S&P 500 падна за околу 3 отсто од почетокот на годината, а Nasdaq индексот е намален за повеќе од 7 отсто.

Цените на акциите вчера паднаа и на повеќето европски берзи. Иако лондонскиот FTSE индекс зајакна за 0,30 отсто, на 8.689 поени, франкфуртски DAX падна за 1,17 отсто, на 22.839 поени, а париски CAC за 0,96 отсто, на 8.030 поени.