Сириските сили се обидуваат да го задушат бунтот на алавитите во неговиот повој

Конфликтот ги разниша напорите на привремениот претседател Ахмед ал-Шара, поранешен водач на џихадистичките сунитски групации сојузници со Исламската дражва и Ал Каеда, да ја консолидира контролата врз земјата додека неговата администрација се бори да ги укине американските санкции и се соочува со зголемени безбедносни предизвици, особено во југозападниот дел на земјата каде Израел сака да го спречи распоредувањето на силите под водство на новите власти во Дамаск.

Насилството во четвртокот беше фокусирано во областа Џабла, но се прошири. Во крајбрежните градови Тартус и Латакија е прогласен полициски час, јави државната новинска агенција SANA. Безбедносните сили започнаа операции за расчистување и во градовите и во блиските планини, соопшти агенцијата, цитирајќи извор од безбедносните сили. На цивилите им беше препорачано да останат дома, наведува агенцијата.

Жител на Латакија телефонски разговор со Reuters изјавил дека борбите таму траат веќе 12 часа и дека во градот пристигнало владино засилување. Жител на Тартус рекол дека се слушаат силни пукотници и дека владините сили влегле во градот во петокот наутро и почнале да пукаат во воздух.

Безбедносен извор изјави дека засилувањата влегле во Латакија во петокот наутро бидејќи не можеле во четвртокот поради блокиран пат. Судири се водат во предградијата, безбедносните сили работат на отворање на патот кон Џабла, кој исто така е блокиран, а милициите лојални на Асад опколија голем број позиции во Џабла, изјави изворот.

Алавитските активисти рекоа дека нивната заедница била подложена на насилство и напади по падот на Асад, особено во провинциите Хомс и Латакија.

Иако Шара вети дека ќе управува со Сирија на инклузивен начин, тој не се сретна со високи алавитски лидери, за разлика од припадниците на другите малцинства како Курдите, христијаните и Друзите.

Владата на Асад од изнувнувањето на граѓанската војна во 2011 година се потпираше на лојалноста на припадниците на алавитите во безбедносниот апарат и државната администрација, кои новите исламистички власти се обидуваат да ги реформираат, вклучително и преку масовни отпуштања.

Алавитскиот исламски совет ја обвини владата на Хајат Тахрир ал-Шам (HTS) за насилството, објавувајќи дека „воените конвои биле испратени на брегот под изговор за „остатоци од режимот“ за тероризирање и убивање Сиријци. Советот побара крајбрежниот регион да биде ставен под заштита на ОН.

Саудиска Арабија, која учествуваше заедно со другите регионални сунитски монархии и западните земји во покренувањето на бунтот против владата на Асад, ја поддржа шеријатската администрација, осудувајќи ги „злосторствата на непријателските групи“ во Сирија и нивните напади врз безбедносните сили. Ријад „стои на страна“ на сириската влада во нејзините напори да ја зачува безбедноста и мирот, се вели во соопштението.