Новите американски царини на кинески прозиводи стапија во Сила, Кина возвраќа со контрамерки

Кинеската влада соопшти и дека ќе воведе царини од 15 насто на американскиот јаглен и течен природен гас, како и 10 насто на сировата нафта, земјоделски машини и автомобили со големи мотори.

Кина претходно поднесе тужба до Светската трговска организација против Америка за кршење на правилата со еднострано воведување царини. Аналитичарите сметаат дека Пекинг морал да одговори со контрамерки на царините на Трамп, но дека не станува збор за голема одмазда.

Во меѓувреме Пекинг Пекинг додаде две американски компании (ПХВ Корп за брендовите Томи Хилфигер и Келвин Клајн и американската биотехнолошка фирма Илумина ) на листата на субјекти за истрага, а најави и истрага против Гугл под сомнение дека компанијата ги крши антимонополските закони.

Ова не е прв пат Трамп да воведува царини на кинеските производи. За време на неговиот прв мандат воведе царини на кинески прозиводи во вредност од 360 милијарди долари, а Кина тогаш одговори со контрацарини на американските стоки. За време на мандатот на Џо Бајден повеќето царини на стоките од Кина останаа во сила, а беа воведени и за некои нови производи, како што се електричните возила.

Канада и Мексико ги избегнаа царините во последен момент. Предложените царини од 25 насто се паузирани на еден месец. Трамп претходно рече дека царините ќе бидат во сила се додека овие две земји не го запрат приливот на илегални имигранти во САД и дрогата фентанил.

Неколку часа откако Трамп ги најави високите царини за Канада, навивачите во главниот град Отава ги исвиркаа спортисите од Америка за време на натпревар на НХЛ лигата.

По повеќечасовни разговори, Мексико и Канада потврдија дека ќе ја зголемат безбедноста на границите за да го запрат текот на илегална имиграција и дрога. „Канада се согласи да ги обезбеди границите и ќе имаме сигурна северна граница“ напиша Трамп на неговата мрежа „Truth social“.

Канадскиот премиер во заминување Џастин Трудо вети дека ќе потроши повеќе од милијарда долари на безбедносни мерки, дека ќе именува личност која ќе ги надгледува акциите за да се блокира продажбата на фентанил, а картелите да ги наведе како терористи.

Сличен договор потврди и мексиканската претседателка Клаудија Шејнбаум. Мексико се согласи и да испрати 10 000 војници од Националната гарда на границата со САД.

Доколку се воведат царини се претпоставува дека најголема штети ќе има Мексико со пад на извозот од 35 насто, канадскиот извоз ќе падне за 28 насто, а американскиот за 22 насто.