Нафтата близу 74 долари

Во втората половина од седмицата, трговците беа загрижени од најавата на ЕУ за нови санкции за руската нафта. Во средата амбасадорите на ЕУ се договорија за 15-от пакет санкции против Русија поради војната во Украина, објави унгарското претседателство.

„Задоволна сум што беше усвоен 15-тиот пакет санкции, чија цел е првенствено руската „сива флота“, напиша претседателката на Европската комисија, Урсула фон дер Лајен на X.

Русија го заобиколува ценовниот лимит на Г7 од 60 долари по барел со ткн „сива флота“, кој им забранува на превозниците и на осигурениците да сервисираат поскапи руски барели. Но познато е дека запаните трговци го набавуваат руските барели по повисоки цени од трети земји, наводно како преработени.

САД би можеле да ги следат стапките на ЕУ и да воведат уште построги санкции за руската трговија со нафта, само неколку седмици пред Доналд Трамп да стапи на должност, објави во вторникот Bloomberg News, цитирајќи извори запознаени со ова прашање.

„Заострувањето на санкциите на ЕУ против Русија сè уште одекнува на пазарот, зголемувајќи ги цените, а САД сигнализираат дека може да се приклучат, па идејата за намалени испораки на руска нафта со бродови нема да избледи“, објаснува Џон Еванс од PVM.

Цените седмицава ги поттикнаа податоците на кинеската царинска управа за зголемениот увоз на сурова нафта во ноември. Во претходните шест месеци рафинериите беа воздржани во набавките. Кинескиот увоз, исто така, би требало да биде поголем на почетокот на 2025 година бидејќи рафинериите ќе купуваат повеќе нафта од Саудиска Арабија, привлечени од пониските цени, шпекулира Reuters.

Во таков амбиент падна во втор план проценката на Меѓународната агенција за енергетика (IEA) за вишокот на понудата во следната година. Во четвртокот, IEA малку ги зголеми проценките за растот на побарувачката оваа и следната година, но нагласи дека понудата ќе порасне уште посилно благодарение на групата независни производители предводени од САД. Во такви услови пазарот во 2025 година би требало да забележи вишок од речиси милион барели дневно, пресметаа тие.