НБА лига: Јокиќ повторно феноменален – за 24 часа 104 коша

Денвер Нагетс повторно ги совладаа Атланта Хокс со 141:111 на гости благодарение на одличниот Никола Јокиќ, прекинувајќи ја серијата од два пораза.

Гостите поведоа со „тројката“ на Јокиќ и до крајот на мечот не ја испуштија предноста, на крајот беше +30. Јокиќ постигна 48 поени со 14 скока и осум асистенции, а на крајот од првото полувреме реализираше и „тројка“ од половина терен. Тоа беше уште еден одличен настап откако во саботата против Вашингтон Визардс впиша 56 поени, 16 скока и осум асистенции. Јокиќ на тој начин за само 24 часа постигна вкупно 104 кошеви, 30 скока и 16 асистенции.

Американските медиуми пишуваат дека српскиот кошаркар стана првиот играч по Вилт Чембрлен во 1963 година кој забележал последователни натпревари со најмалку 45 поени, 10 скока и пет асистенции.

Мајкл Портер Џуниор додаде 26 поени. Денвер сега е седми на Западот со 12 победи и 10 порази.

Де’Андре Хантер со 20 поени и Дајсон Даниелс со 18 поени беа најефикасни кај домаќините, кои сезонава загубија 12 пати, со 13 победи.

Кошаркарите на Лос Анџелес Клиперс беа поразени во својот „Интуит Дом“ од Хјустон Рокетс со 106:117. Без важното дуо Џејмс Харден и Амир Кофи, Клиперс не можеа да бидат во чекор со Хјустон Рокетс.

Како клучна се покажа втората четвртина, по која гостите заминаа на пауза со 12 поени (64:52) и не ја препуштија предноста до крајот на натпреварот. Во последниот дел домашните ја намалија негативата на осум поени, но тоа беше се.

Без Харден, тоа значеше дека Ивица Зубац и Норман Пауел мораа да носат повеќе од товарот. Зубац одигра одличен натпревар и оствари 22 коша со шут од поле 9 од 15 и 12 скока, но Пауел се мачеше, погодувајќи пет од 18 шута од поле, вклучувајќи и една „тројка“ во осум обиди и дојде до 17 поени. Боунс Хајланд додаде 22 поени, Кевин Портер 19 во 11-от пораз на Клиперси со 14 победи.

На победничката страна, целата стартна петорка имаше двоцифрен број на поени, Џејлен Грин беше најефикасен со 31 поен, Амен Томпсон додаде 22 поени и осум скока, а Дилон Брукс имаше 19 поени и седум скока. Тоа беше 16-та победа за Хјустон во осум порази.

Сан Антонио Спарс ги совладаа Њу Орлеанс Пеликанс со 121:116, а Бруклин Нетс беа поразени од Милвоки Бакс со 113:118.

Водечкиот тим на Истокот, Кливленд Кавалирс го претрпеа само четвртиот пораз сезонава, губејќи со 113:122 на гостувањето кај Мајами Хит. Хит ги предводеше Тајлер Херо со 34 поени, погодувајќи пет „тројки“. На спротивната страна најефикасен беше Дариус Гарланд со 23 коша.

Голден Стејт Вориорс по пресврт ги совладаа Минесота Тимбервулфс со 114:106, а во победата придонесе Стивен Кари со 30 поени и осум асистенции.

Домашните Лејкерс играа во Лос Анџелес без првата ѕвезда Леброн Џејмс кој се повреди и ги победија Портланд Трејл Блејзерс со 107:98. Кај Лејкерс најдобар беше Ентони Дејвис со 30 поени, Д’Анџело Расел додаде 28 на победата, а Руи Хачимура 23. Кај Портланд најефикасен беше Шедон Шарп со 19 поени.

globe

Слични новости