Цените на нафтата паднаа на 62 долари на меѓународните пазари во вторникот, а знаците за напредок во разговорите за мировниот план за Украина ги поттикнаа шпекулациите за можен полесен пристап до руската нафта.
Со барелот во Лондон попладнево се тргуваше по цена пониска за 1,36 долари во однос на вчерашното затворање на пазарот, од 62,01 долари. За речиси ист износ барелот поевтини и на американскиот пазар, каде што се тргуваше за 57,49 долари.
Одделните пресметки на Организацијата на земјите извознички на нафта (OPEC) покажаа дека барелот од референтната нафтена кошничка на нејзините членки во понеделникот поскапел за 14 центи и чинел 63,14 долари.
Пазарите беа преокупирани на почетокот на неделата со разговорите за рамката на САД за мировен план за Украина. Според медиумските извештаи, Вашингтон кон крајот на минатата седмица изготви рамка од 28 точки, која била намалена на 19 точки по разговорите со украинските претставници во Швајцарија минатиот викенд.
Во меѓувреме, висок американски воен функционер, Ден Дрискол, се сретна ненајавено со руските претставници во Абу Даби, објави Reuters, но сè уште не е познато што разговарале.
Навестувањата за дипломатско решение на конфликтот повторно ги разгореа шпекулациите за можно ублажување на санкциите врз руската нафта, велат аналитичарите. САД на почетокот од месецот воведоа санкции врз руските нафтени гиганти „Лукоил“ и „Росњефт“, кои заедно произведуваат 5 отсто од светската нафта.
Одлуката на САД ги поттикна рафинериите во Индија да ги наполнат своите магацини со евтини руски барели пред крајниот рок за склучување трансакции, па се очекува индискиот увоз во ноември да достигне петмесечен максимум од 1,85 милиони барели дневно, според податоците од специјализираната фирма Kpler.
Руските компании ќе испорачаат многу нафта во ноември, бидејќи многу рафинерии кои се специјализирани за преработка на таквите видови нафта сакаат да ги наполнат своите резервоари, велат извори од трговските кругови.
Во меѓувреме, ирачкиот извоз се зголеми за 7,8 отсто во октомври на 110 милиони барели, покажаа податоците од државната компанија за продажба на нафта ЅОМО, што би одговарало на 3,58 милиони барели дневно. Кога ќе се додаде нафтата од полињата во ирачкиот дел на Курдистан, испораките достигнаа вкупно 110,65 милиони барели.
Слични новости
Производството на чај во Индија опадна во октомври
Производството на чај во Индија опадна во октомври поради неповолните временски услови во државата Асам
Цените на нафтата на 64 долари
Цените на нафтата се искачија на 64 долари во петокот на меѓународните пазари, а инвеститорите шпекулираат дека намалената понуда од Венецуела во случај на воена интервенција на САД ќе ги принуди кинеските и американските рафинерии да бараат замена
„Аmazon“ со уплата од 180 милиони евра ја затвори истрагата за можна дночна измама во Италија
Подружница на американскиот гигант за е-трговија „Amazon“ им плати околу 180 милиони евра на италијанските даночни власти и го укина својот систем за следење на испораките со цел да ја затвори истрагата за можна даночна измама и експлоатација на работници