Цените на нафтата над 63 долари

Тргувањето беше пригушено поради Денот на благодарноста во САД и празничниот викенд, со пауза од неколку часа поради технички проблеми на Чикашката стоковна берза.

Расположението на пазарите на нафта оваа седмица беше обележано со преговори за рамка за мировен договор за Украина. САД минатиот петок, според медиумските извештаи, составија список од 28 точки за рамката на идниот договор, кој наводно бил ревидиран на само 19 точки по состанокот со украинските претставници во неделата.

Вашингтон ѝ доставил на Москва детали за планот, кој беше финализиран по американско-украинските консултации, изјави портпаролот на рускиот претседател Владимир Путин, Дмитриј Песков, во петокот, додавајќи дека темата ќе се дискутира во Москва следната седмица. Рускиот претседател во четврток изјави дека планот може да биде основа за напорите за прекин на конфликтот во Украина, а специјалниот американски претставник Стив Виткоф треба да пристигне во Москва следната недела.

Трговците се во исчекување и на редовниот месечен состанок на членки на OPEC и нивните сојузници големи независни производители предводени од Русија на кој ќе се разгледува заедничката политика на производство.

Групата од осум земји во рамките на OPEC+ почна постепено да го нормализира производството, но веќе објави дека ќе направи пауза во првиот квартал од 2026 година.

„По декември, осумте земји одлучија да го паузираат зголемувањето на производството во јануари, февруари и март 2026 година од сезонски причини“, објаснија тие.

Побарувачката традиционално слабее во зимските месеци и се зајакнува кон средината на годината и врвот на сезоната на патувања на северната хемисфера.

Групата неодамна ја ревидираше својата прогноза за понудата и побарувачката на пазарот за следната година и сега очекува мал вишок. До неодамна, очекуваше понудата и побарувачката да бидат во рамнотежа.