Цените на нафтата близу 65 долари

Кон крајот на седмицата вниманието на трговците се префрли на состанокот на Организацијата на земјите извознички на нафта (ОРЕС) и нејзините сојузници, големите независни производители предводени од Русија. Групацијата позната како ОРЕС+ ќе се состане в недела за да ја преиспита политиката на производство. Плановите за октомври и ноември предвидуваа дополнителни 137.000 барели дневно да се пуштат на пазарот, околу трипати помалку отколку во септември.

Групата би можела да биде ограничена во снабдувањето во декември, враќајќи се на само дополнителни 137.000 барели дневно, изјавија три извора на Reuters. Четврти извор изјави дека е можна и пауза во нормализацијата на снабдувањето.

ОРЕС, канцеларијата на рускиот вицепремиер задолжен за енергетските политики Александр Новак и канцеларијата за односи со јавноста на саудиската влада не одговорија веднаш на барањето на Reuters за коментар за изјавите на изворите.

Евентуалниот кинески договор за купување повеќе американски енергенси ќе ги поддржеше цените на нафтата во петокот, но се чини дека е компензиран од поостриот од очекуваниот пад на кинеската индустриска активност во октомври, според индексот на менаџерите за набавки од 49. Вредностите под 50 укажуваат на пад на активноста.

Истовремено, движењето на цените сугерира дека санкциите на САД врз руските нафтени гиганти „Росњефт“ и „Лукоил“ нема значително да ја намалат понудата на руските барели, изјавија аналитичарите во ING.

„Вчерашниот состанок меѓу (американскиот) претседател (Доналд) Трамп и (кинескиот) претседател Кси (Џинпинг) само ја зајакна проценката (на инвеститорите) бидејќи испораките на руска нафта за Кина очигледно не беа дел од разговорите на двајцата челници“, додадоа аналитичарите.

Ова е важно за пазарот, бидејќи Кина увезува околу два милиона барели руска нафта дневно и е единствениот купувач што може значително да ги зголеми испораките доколку Индија го намали увозот, забележаа аналитичарите на ING.