Цените на нафтата близу 62 долари

 На почетокот од седмицава, трговците ги проучуваа вестите за преговорите за мировниот план за Украина. Американските и украинските претставници изјавија дека разговорите во Женева во неделата биле „многу продуктивни“ и дека имаат намера да продолжат да го „рафинираат“ мировниот план предложен од САД минатата недела.

Мирот во Украина би можел да ги намали цените на енергенсите, бидејќи некои санкции и ограничувања за Русија би можеле да бидат ублажени, велат аналитичарите. Вашингтон неодамна воведе санкции врз руските нафтени гиганти „Лукоил“ и „Росњефт“, кои заедно произведуваат 5 отсто од светската нафта. Целта е да се ограничи буџетскиот капацитет на Русија за финансирање на војната во Украина, според Вашингтон.

Санкциите би можеле да блокираат околу 48 милиони барели нафта на „Росњефт“ и „Лукоил“ на танкери што се упатуваат кон Индија и Кина и да ги натераат да бараат нови купувачи, според пресметките на деловната новинска агенција Bloomber News од петокот врз основа на податоци од специјализираната фирма Kpler.

Русија сè уште испорачува околу 3,4 милиони барели нафта дневно на странски купувачи, и покрај санкциите, забележa Bloomberg.

Покрај испораките од Русија, расположението на пазарот последните денови е обележано со прогнози за вишокот.

Понудата треба да ја надмине побарувачката за просечно два милиона барели дневно во 2026 година, па затоа цените на нафтата ќе паднат уште пониско, според проценките на американската инвестициска банка „Global Sachs“. Но, следната година ќе го означи и крајот на сегашниот голем бран понуди, предупреди „Global Sachs“.

Меѓународната агенција за енергија (IEA) пресмета дека поради изобилството на понуда и ограничената побарувачка, вишокот следната година ќе изнесува четири милиони барели дневно. Вишок очекуваат и во OPEC, но многу поскромен. До неодамна, тие предвидуваа дека понудата и побарувачката ќе бидат во рамнотежа следната година.