Опозициската СДСМ смета дека разговорите за промена на државниот грб е еден од низата неиспланирани предлози на владејачката ВМРО-ДПМНЕ. Како што тврди претседателот на партијата, Венко Филипче, предлогот бил на маса за време на владеењето на владата на ВМРО-ДПМНЕ и ДУИ.
„Тогаш беше дел од пакет на мерки кој што требаше да се донесе. Конкретно, сметам дека првата дилема што се поставува е дали во коалицијата со ВЛЕН, освен за овој предлог, ќе се разговара и за измена на химната? Тоа е нешто на што ВМРО-ДПМНЕ треба да одговори. Сметаме дека државниот грб сосема соодветно ги отсликува сите карактеристики на ова поднебје, јасен е континуитетот на НОБ и антифашистичка војна. Нема никаква поделба во однос на етнички групи. Доколку има таква иницијатива, со сите демократски средства најостро ќе се спротивставиме на промена на државниот грб“, рече пратеникот и претседател на СДСМ, одговарајќи на новинарски прашања на прес-конференција.
Владејачките ВМРО-ДПМНЕ и ВЛЕН веќе разговарале за евентуална промена на државниот грб. Според премиерот Христијан Мицкоски, ова прашање е отворено и цени дека „ние сме една од двете пост-социјалистички земји кои што се уште го имаат стариот државен грб со мали модификации“.
ЛДП утрово предложи поставување на рисот на новиот грб, како препознатлив вид, карактеристичен токму за нашата држава.
Ваквата идеја потекнува од 2014 година кога владата на ВМРО-ДПМНЕ предводена од Груевски излезе со таков предлог. Тогаш стануваше збор за црвен лав на златно-жолта позадина во форма на штит, како и круна во горниот дел во форма на тврдина. Меѓу објаснувањата на тогашната власт беше дека Македонија и Белорусија биле единствени во Европа што имаат државен грб инспириран од советската хералдика.
Тогаш ДУИ се согласи на ваков државен грб, нагласувајќи дека лавот е дел и од албанската традиција, а го има и во грбот на градот Тирана. Круната, пак, рекоа, го претставува Скопското кале.
До 2009 година, Македонија го користеше стариот социјалистички грб, додека пак на 16 ноември 2009 година е усвоен грб кој е многу сличен со стариот социјалистички и разликата е во тоа што е тргната црвената петокрака.
Слични новости
Мицкоски: Ќе преземеме низа мерки, активности и одлуки, тоа Ви го должам Вам, го должам и на семејствата на загинатите, на медиумите и на секој еден човек во Македонија
Со едноминутно молчење премиерот Христијан Мицкоски ја почна прес – конференцијата на која потенцираше дека во неговиот живот имал многу тешки моменти и предизвици, но ова денес, како што рече, е убедливо најтешкиот ден од мојот живот.
Чупеска: За трагедијата во Кочани мора да има одговорност
Потпретседателката на СДСМ, Ана Чупеска денеска на прес-конференција од седиштето на партијата побара одговорност од министерот за внатрешни работи Панче Тошковски, но и темелна и независна истрага за трагедијата во Кочани. Таа испрати апел до Обвинителството и сите истражни органи оваа трагедија да ја истражат до крај, и одговорните да одговараат
МВР за пожарот во Кочани: Осомничени над 20 лица, 15 се во полициска станица
МВР во координација со Јавното обвинителство до овој момент во врска со синоќешниот пожар во ноќен клуб во Кочани има осомничено 20 лица, од кои 15 се во полициска станица, информираше министерот за внатрешни работи Панче Тошковски. Легална лиценца за работа фирмата немала и повеќе детали, Тошковски во овој дел од истрагата, рече дека не може да открие, но посочи дека, како и многу други работи од минатото е поврзана со мито и корупција.