Улогата на Бајден за прекинот на огнот во Газа ја засени Трамп

„Оваа епска спогодба за прекин на огнот можеше да се случи само како резултат на нашата историска победа во ноември, затоа што му сигнализираше на целиот свет дека мојата администрација ќе бара мир и ќе преговара за договори за да се обезбеди сигурноста на сите Американци и нашите сојузници“, напиша Трамп, преземајќи ги заслугите за дипломатскиот успех по 15 месеци разурнувачка војна.

Зборувајќи подоцна во Белата куќа Бајден рече „дека неговите дипломатски напори никогаш не престанаа“, но призна дека неговата администрација работеше со тимот на Трамп за да се обезбеди САД да зборуваат со еден глас.

Трамп го испрати својот иден претставник  за Блискиот исток Стив Виткоф на преговорите за прекин на огнот во Катар.

Бајден, кој беше под постојана критика на прогресивното крило од Демократската партија поради неговата постојана поддршка на Израел, рече дека договорот го развил и го преговарал неговиот тим. Бајден нема дилема дека е постигнат договорот што го осмисли и испреговара неговата дипломатија, па на прашањето на новинарите дали признанието за прекин на огнот во Газа го заслужуваат тој или Трамп одговори „дали вие се шегувате“?

Трамп е познат по својата склоност да биде наметлив, а неговата вмешаност во попречувањето на договорот за примирје е широко призната. Поранешниот службеник на Стејт департментот Мајк Кејси рече дека постојат аргументи дека Израел го темпираше договорот „како подарок за Трамп“. „Постојат внатрешни превирања за Нетанјаху и тоа во суштина не се разликува од договорот кој можеше да биде постигнат во мај“, изјави Кејси.

Во Израел некои медиуми сугерираа дека вмешаноста на Трамп беше одлучувачку фактор во успехот. „Тајм оф Израел“ повикувајќи се на двајца високи арапски преговарачи, објави дека учеството на пратеникот на Трамп Стив Виткоф во преговорите, во една единствена рунда од разговорите направи повеќе за да „го поттикне Нетанјаху“ да го прифати договорот, од притисокот на Бајден во текот на цела една година. Дури и службеници од администрацијата на Бајден признаваат дека тимот на Трамп одигра значајна улога во постигнувањето примирје.

За Бајден, засенувањето на неговата улога во примирјето во Газа потсеќа на политичката среќа на покојниот американски претседател Џими Картер, кој како демократ служеше само еден мандат и соработуваше со администрацијата на неговиот наследник Роналд Реган за да се обезбеди ослободување на 52 американски заложници кои беа затворени во американската амбасада во Техеран. Кризата доминираше за време на последната година на мандатаот на Картер и придонесе за неговата слаба поддршка од јавноста пред убедливиот пораз на изборите.