Наследивме девастирано и комплетно дегенерирано здравство и нормално е дека е невозможно со магично стапче за седум до осум месеци од македонско здравство да направите норвешко или шведско здравство, изјави министерот Арбен Таравари во Неделното интервју за Радио Слободна Европа.
Во изминатите месеци, како што вели, тие прават сѐ според можностите да се подобрат состојбите, спомнувајќи дека е потпишан колективниот договор со медицинскиот кадар и медицинскиот персонал.
„Покачени се платите на докторите за 5 отсто минатата година, од 1 ноември, и во март треба уште 5 отсто повторно, додека за медицинските сестри е покачена до 17 отсто платата. Ова е една од работите што е направена“, вели Таравари.
За најавеното вработување на 600 приватни специјализанти, вели дека болниците може набргу сами да објават конкурси и да ги вработат. Соопшти дека 300 ќе бидат вработени до крајот на март, 300 други до крајот на декември 2025.
„Имено, 1.200, односно 1.180 средномедицински кадар, генерално, кои беа договорци по пет, 10 и повеќе години, исто така, до крајот на март, треба на сите овие да им се даде решение во здравствените установи. Меѓутоа, чекаме заедно со специјализантите и овие да бидат третирани“, посочи министерот во интервјуто.
Наскоро тој рече дека очекува скопската Гратска општа болниа „8-ми Септември“ да стане регионална болница и дека интензивно се работи на подготвување на целата документација. Како што рече, не само „8-ми Септември“, регионални болници ќе станат и клиничките болници во Тетово, Штип и во Битола.
„Идејата е и ‘8-ми Септември’ да се дисперзира како и цела Онкологија да функционира слично на Трансфузиологија. Значи, институтот, односно Клиниката за онкологија и радиотерапија да биде одговорна за сите центри, и во ‘8-ми Септември’, и во Битола, и во Штип и во Тетово. Така би функционирало најдобро, под ист чадор да се сите, како што функционира и Трансфузиологија одамна во Македонија. Ваквата организираност на Клиниката за онкологија со филијали во овие градови би било најфункционално. Ќе видиме, времето ќе покаже дали ќе функционират или нема да функционираат“, смета Таравари.
Во интервјуто за РСЕ министерот за здравство одговара и на прашања за наталожените долгови на болниците и за нивната рационализација. Во врска со долговите смета дека треба да се најде решение, а едно од можните решенија, вели, „можеби и кога ќе ја направиме Стратегијата да размислиме да почнеме од почеток“.
Во однос на потребата од рационализирање на болниците, Таравари одговори дека „имаме луксузно здравство во моментот“ затоа што во два блиски града работат болници што даваат исти услуги за пациентите.
„Невозможно е во Струга и во Охрид, кои се седум километри еден од друг, во овие два града да има седум болници. Невозможно е Тетово и Гостивар, кои се 25 километри, односно 20 минути патување со кола или 30 минути, да имаат две огромни болници во кои ќе се третираат и педијатрија и ортопедија и хирургија, и гинекологија. Има повеќе вакви болници низ државата, во градови кои се на 20-30 км, а имаат две огромни болници. Ние мора долгорочно да размислуваме“, додава Таравари во интервјуто за Радио Слободна Европа.
Слични новости
Агелер: Внимателно ги следиме процедурите во Собранието во врска со изгласаните интерпелации за петте членови на Судскиот совет
Многу внимателно ги следиме процедурите во Собранието и изјавите во врска изгласаните интерпелации за петте членови на Судскиот совет, посочи денеска амбасадорката на САД, Анџела Агелер
Членството во НАТО е најголемиот придонес за нашата безбедност, активно придонесуваме во дискусиите и носењето одлуки
Ние не сме повеќе објект во геополитичките дискусии, сега сме субјект кој активно придонесува во дискусиите и во носењето на одлуки по сите прашања. Моментално го имаме најголемиот буџет во Министерството за одбрана во овие децении
Уставен суд: Институтот „интерпелација” предвиден во членот 72 од Уставот, во никој случај не се однесува и не може да се примени за уставните судии
Институтот „интерпелација” предвиден во членот 72 од Уставот, во никој случај не се однесува и не може да се примени за уставните судии. Во спротивно, се губи смислата на Уставниот суд и се прави тешка повреда на Уставот од причина што на тој начин се прави упад во четвртата т.н.уставно-судска власт, во самостојноста и во независноста на Уставниот суд, стои во ставот од Уставен.