Судењето за убиството на Вања и Панче продолжува на 16 мај откако денеска во Основниот кривичен суд во Скопје заврши сведочењето на обвинетиот Љупчо Палевски кој негираше насилни кривични дела и изјави дека според него мотивот за убиство е нелогичен и недокажан.

По неговото сведочење, судијата Ивица Стефановски се изјасни по повеќе барања на обвинетиот Палевски кои биле доставени во текот на постапката. Судот информираше дека прифаќа да се прибави видеозапис од експозитурата на Халк Банка за ден 27.11.2023 година од 9 до 12 часот. Не се прифати барањето да се повикаат како сведоци двата вештаци кои ја вештачеле чаурата, затоа што барањето не било доставено на време, согласно Законот за кривична постапка. Беше прифатено да се изведе како доказ чаурата пронајдена на местото каде што е убиен Панче Жежовски.

Судијата информираше дека денеска е доставен поднесок од бранителот на Палевски, адвокатот Јовица Страшевски, со други поднесоци во прилог, за кои рече дека Судот има потреба од дополнително време за да го разгледа.

На 16 мај се очекува да заврши доказната постапка и да се почне со дополнение на доказната постапка.

Во текот на распитот, Палевски, кој претходно негираше каква било врска со насилни кривични дела, денеска повторно изрази уверување дека целиот процес е политички прогон против него. Во однос на мотивот за убиството, Палевски ги негираше сите обвинувања, посочувајќи дека не постојат докази кои ја поткрепуваат тврдењата на обвинителството.

Неговиот бранител, адвокатот Јовица Страшевски и бранителот на обвинетиот Боре Видевски, Бојан Манев, во изјава за медиуми денеска истакнаа дека како дел од дополнението на доказната постапка ќе бараат и реконструкција на настаните, поради тоа што, како што посочија, многу работи во досегашниот процес останале неразјаснети.

Обвинителката го праша Палевски за сведок кој тој тврди дека го сретнал на тој ден, лице кое наводно се плашело од неговото куче, но Палевски не можеше да го именува тоа лице. Тој тврдеше дека сведокот бил физички нападнат од истражителите, иако не можеше да наведе конкретни детали за него.

„Јас не можам да се сетам на името и презимето на лицето, но тоа лице постои и има сериозни последици“, рече Палевски, додавајќи дека неговата одбрана планира правни чекори во врска со тоа.

Во однос на неговата комуникација на денот на настанот, Палевски негираше дека бил активен на телефонот до 13:14 часот. Според неговото објаснување, тој користел интернет преку Телеграм и се избегнувал јавни телефонски линии за да не биде незаконски прислушкуван.

„Не одговарам на повици на обична линија затоа што не сакам да бидам незаконски прислушуван, користам исклучиво Телеграм“, рече обвинетиот.

Според него, телефонската анализа не ги објаснува времињата на повиците и интернет комуникацијата, што ги прави обвинителските докази непотполни.

„Еве како беше на 22.11.2023. Телефонскиот повик кој го спомнавте е на обична линија, ГСН разговор. Тој разговор во извештајот е поделен на 7 разговори, сите по 60 секунди, и после тоа нема базни станици во извештајот до 16:30 часот“, изјави Палевски.

Тој, исто така, го објасни своето присуство во Халк Банка на 24 ноември, кога бил извршен обид за грабнување на Вања, при што негираше дека тој го смета за алиби.

„Токму кога вие тврдите дека има неуспешен обид за грабнување на Вања, 24.11.2023 година, јас бев во истата банка каде јас не знаев дека правам алиби, туку со мојот печат морав лично да отидам во Халк банка на 24 исто така, за да потпишам заклучно и удрам печат за продажба на девизен прилив од Гугл, Јутуб, 1.000 евра и така јас дента имам намера, сум си направил алиби за 24 иако времето кога бев да потпишам заклучница не е 7:20 како вие тврдите, туку е после 10 часот. Токму затоа што не сум правел алиби на начин каков сум можел да направам, покажува нешто друго, а не намера да грабнуваш и убиваш“, образложи тој.

Во однос на мотивот за убиството, Палевски ги негираше сите обвинувања, посочувајќи дека не постојат докази кои ја поткрепуваат тврдењата на обвинителството.

Тој истакна дека не е заинтересиран за користољубие, туку дека обвинението е нелогично и недокажано. Палевски дури и ги оспори обвинувањата дека имал контакт со семејството на Вања, посочувајќи дека и самиот Александар, поранешниот партнер на Зорица, бил веќе во посед на најскапиот имот.

„Вашиот мотив во обвинението со кое ме обвинувате е нелогичен и недокажан затоа што не сте приближиле ниту еден доказ. Моето компарирање на логики и кажување дека доколку е користољубие ќе имаше за детето засолниште прво, а не класично убиство, ќе имаше контакт со мајката или таткото за да се направи таа уцена, за да се принуди некој да даде пари, но не само што не се случило, туку вие не понудивте ниту еден доказ на таа многу важна околност, мотив зошто е сторено делото. Затоа и дадов пример со просечен криминален ум не разводи, не ме интересира тоа, јас во списите прочитав дека Александар веќе го поседува најскапиот имот на семејството станот во зградата Фонтана каде е грабнато детето кој има вредност преку 250000 евра и дека остатокот од имотот доколку биде убиена мајката на детето, а не детето, затоа што се малолетни, законски старател е токму Александар, во тој контекст беше кажано дека мотивот не само што не е докажан, туку тотално нелогичен за да биде користољубие и уцена“, одговори тој.

Останатите обвинети и нивната одбрана немаа прашања за Палевски. Додека, Судот го праша во врска со магнетните резонанци, при што Палевски одговори дека тие снимки не биле наведени на списокот на одземени предмети, иако, како што рече, ги имал со себе кога патувал во Белград.

Судскиот процес продолжува со процесни решенија по кои треба да се утврдат термини за наредни рочишта на кои се очекуваат дополненија на доказната постапка.

globe

Слични новости

Николоски: Наесен ќе се одржат само локални избори, не очекувам Таравари да соработува со ДУИ со што би направил политичко самоубиство

Николоски: Наесен ќе се одржат само локални избори, не очекувам Таравари да соработува со ДУИ со што би направил политичко самоубиство

Потпретседателот на Владата и министер за транспорт Александар Николоски вели дека прашањето за предвремени парламентарни избори заедно со локалните избори е затворено прашање и дека наесен граѓаните ќе гласаат само за општински советници и градоначаници, а во 2028 година ќе се одржат редовни парламентарни избори.

Филипче: Македонија годинава ќе биде со најнизок економски раст во регионот

Филипче: Македонија годинава ќе биде со најнизок економски раст во регионот

По десет месеци од новата власт, разочарувањето е големо. Цените продолжуваат да растат, платите стагнираат, а граѓаните се потешко врзуваат крај со крај, истакна претседателот на СДСМ Венко Филипче, кој денеска беше во посета на Радовиш и се сретна со граѓаните

Сиљановска Давкова: Ако сакаме промени, Уставниот суд мора да се одважи и независно да се однесува кон останатите власти

Сиљановска Давкова: Ако сакаме промени, Уставниот суд мора да се одважи и независно да се однесува кон останатите власти

Во последните 34 години ние пропуштивме Уставниот суд да израсне во четврта власт, во коректор на односите меѓу трите власти и заштитник на слободите и правата на граѓаните. Ако сакаме промени, оваа институција мора да се одважи и посегне по својата надлежност, навистина да ја гради уставната демократија и независно да се однесува кон останатите власти, вели Претседателката на Република Северна Македонија, Гордана Сиљановска Давкова