Србија: Блокадите на факултетите сѐ помасовни, актерите застанаа покрај студентите

Во сите четири универзитетски центри во Србија, во тек е координираната блокада на ректоратите и на повеќе од 50 факултети и академии за уметност, а студентите бараат објавување на комплетната документација за реконструкцијата на железничката станица во Нови Сад, каде што загинаа 15 лица при уривање на настрешницата на 1 ноември, а две беа тешко повредени.

Студентите бараат и „провокаторите и насилниците кои ги нападнаа студентите и учесниците на претходните протести за време на оддавањето мирна почит на жртвите во Нови Сад, да бидат кривично гонети и да бидат ослободени активистите и демонстрантите уапсени на тие комеморативни собири“.

Српскиот претседател Александар Вучиќ во понеделникот се обиде да ја убеди јавноста и студентите дека некои од нивните барања се исполнети, а дека наскоро ќе ги исполни и другите, особено зголемувањето на државниот буџет за 20 проценти за факултетите, но студентите не видоа во тоа доволна причина за прекин на протестите и блокадите.

Доколку барањата на студентите не се исполнат до 21 декември, актерите најавија дека ќе ги поканат колегите „да преземат понатамошни чекори“.

„Сметаме дека нашата јавна и безрезервна поддршка за студентите треба да трае до исполнување на нивните барања, односно до завршување на блокадите“, велат од Здружението.

Актерите велат дека „како долгогодишни соработници на Радио-телевизија на Србија“ бараат медиумската куќа „вистински, непристрасно, целосно и навремено да ги информира“ граѓаните за барањата на студентите и актуелните блокади на високообразовните институции, „со што ја исполнува својата улога како јавен медиумски сервис“.

Во Нови Сад, Белград и други градови денеска беше организирана акцијата „Стоп за Застани Србија“ со која во 11,52 часот во моментот на паѓање на настрешницата на станицата во Нови Сад со 15-минутен молк веќе традиционално наводно беше оддадена почит на жртвите.