По информациите дека Собранието и седмицава нема да заседава и да се одржуваат седници на собраниските тела, оттаму денеска информираат дека во законодавниот дом се работи на законски решенија кои од понеделник ќе се пуштаат во процедура, како и дека се очекува да пристигнат предлог закони поднесени од Владата и министерствата.
По вчерашната координација беше соопштено дека присутните консензуално се согласиле имајќи ги во предвид чувствата на сите граѓани по трагедијата во Кочани, изразувајќи почит кон сите загинати и надеж дека повредените ќе се вратат во добра здравствена состојба што поскоро, Собранието да ги откаже сите активности планирани за оваа работна седмица, вклучително и брифинг со новинари.
На средбата, како што соопштија од Собранието, присуствувале претседателот на Собранието, Африм Гаши, потпретседателката Весна Бендевска и координаторите на ВМРО ДПМНЕ, СДСМ, ВЛЕН, ЗНАМ и Левица, како и претставник од Владата и генералната секретарка на Собранието.
Пратеничката група на ВМРО-ДПМНЕ ќе поднесе Предлог на закон за дополнување на Законот за наставниците и стручните соработници во основните и средните училишта, по скратена постапка.
Пратеничката група на ВМРО-ДПМНЕ соопшти дека пратениците од пратеничката група на ВМРО-ДПМНЕ и коалицијата „Твоја Македонија“, а веруваат и останатите пратеници, секојдневно си ги извршуваат своите работни обврски. Оттаму наведуваат дека нема да се одржуваат седници на Собранието и на работните тела, но појаснуваат дека како пратеници постојано работат на подготвока на законски решенија кои би се ставиле на идните седници од понеделник.
„Дополнително, во сите општини од каде што има жртви и повредени од немилиот настан во Кочани, нашите пратеници се присутни во пратеничките канцеларии и обавуваат средби со граѓаните излегувајќи во пресрет на на сите проблеми со кои се соочуваат“, се наведува во објавата на фејсбук.
Претходно, пратеникот Миле Лефков исто така на фејсбук објави дека е отворена пратеничката канцеларија во Кочани каде тој има средби со граѓани на кои им е потребна помош по трагедијата кога во пожар минатата недела животот го загубија 59 лица, а околу 200 се повредени, најголем број од овој град.
Лефков информира дека канцеларијата за средби со граѓаните во Кочани е отворена секој ден од 10 до 15 часот, каде сите ќе можат да ги споделат своите мисли, предлози и грижи.
„Нашата цел е да слушнеме, да помогнеме и заеднички да работиме на решенија што ќе обезбедат безбедност, поддршка и подобри услови за сите. Секој ваш збор е важен – ве повикувам да дојдете, да зборуваме отворено и да направиме промени заедно“, напиша Лефков.
Средби со граѓани во Штип денеска имал и координаторот на пратеничката група на ВМРО-ДПМНЕ, Никола Мицевски.
Левица, која на вчерашната координација имала свој претставник, денеска излезе со реакција. Според опозициската партија, Собранието донело скандалозна одлука за „колективен одмор“ што ја покажува отуѓеноста на партиите на елитата од барањата на народот.
„Левица беше единствената партија против ова самоволие, во моменти кога пратениците треба и мора да бидат на висина на задачата. Бегајќи од пратенички прашања, плашејќи се од вистината, Собранието избега и од одговорноста. Во овие моменти, кога е повеќе од потребно, Собранието не презема одговорност да носи закони, туку втора недела по ред бега од таа своја обврска“, се наведува во соопштението.
Според партијата, законодавниот дом е единствената непосредно избрана власт и „таа одговора пред народот, а не според желбата за играње криенка на премиерот Мицкоски“. – Пропустите на поранешните функционери не ги ослободуваат од одговорност сегашните функционери, посочуваат од Левица.
Ова, како што наведуваат од партијата, е моментот кога државата мора да покаже дека постои, институциите мора да делуваат брзо, ефикасно и без компромис.
Слични новости
Со реформите на кои сите чекаме, сакаме да видиме силно судство, порача Рокас
Шефот на Делегацијата на ЕУ, амбасадорот Михалис Рокас изјави дека одблизу ги следат случувањата поврзани со разрешувањето на членови на Судскиот совет и смета дека се што може да се гледа како мешање во независноста на судството и во функционирањето на Судскиот совет е прашање што во Брисел предизвикува загриженост.
Платформата на граѓански организации за борба против корупција бара еднаков третман пред законот и вистински системски реформи за безбеден и квалитетен живот на граѓаните
Транспарентна истрага за пожарот во Кочани, реформа на казнена политика, одговорност на институциите, компаниите, теренски проверки, инспекција врз инспекторите, ревизија на постапки за добивање лиценци, итно постапување по насоките на Државната комисија за спречување корупција и Државниот завод за ревизија, како и вертикална одговорност побара денеска Платформата на граѓански организации за борба против корупција.
Влада: Нема официјално барање од СДСМ за лидерска средба, отворени сме за секаков предлог и иницијатива за помош
По најавата на лидерот од опозициската СДСМ Венко Филипче дека следната недела во Собранието ќе иницира лидерска средба по пожарот во Кочани, денеска од Владата велат дека кај нив нема стасано официјално барање, ниту пак иницицијатива од СДСМ, но дека Владата и премиерот се отворени за секаков предлог и иницијатива која има за цел да помогне.