Се отвора грандиозна изложба посветена на „Болеро“ од Морис Равел

На изложбата во „Cite de la Musique“ (Градот на музиката), која опфаќа неколку музички институции во Пакр де ла Вије, во XIX-иот арондисман на Париз, публиката ќе може да се нурне во историјата на ова дело кое се сметало за авангардно и ќе може да види бројни предмети, како партитури, метрономи и облека и мебел, но и фотографии кои ја откриваат личноста на композиторот и да слушаат досега неприкажуваната изведба на „Болеро“ во режија на Парискиот оркестар на огромно платно.

Изложбата е организирана по повод 150-годишнината од раѓањето на Морис Равел (1875-1937), што ќе се слави следната година. Изложбата трае до 15. јуни 2025 година.

„Тоа е едно од најизведуваните музички дела во светот, 16-минутно оркестарско парче кое се карактеризира со повторувачка, хипнотичка структура. Изведбата на ‘Болеро’ во светот започнува приближно на секои 10 минути“, вели Пјер Корзилиус, музиколог и директор на одделот за уметност и култура на лицејот Бернарден.

Партитурата е „минималистичка“ со монотона мелодија и „континуиран ритам“ што се повторува 169 пати, пред крешендото и конечниот „удар што дава печат на грандиозност“, истакнува Корзилиус.

Изложбата е посветена и на изворите на инспирацијата на Морис Равел: неговата љубов кон Баскија (неговата мајка по потекло е од францускиот дел на Баскија), но и неговата фасцинираност со машините и индустријата, што не е изненадувачки бидејќи неговиот татко Жозеф Равел бил швајцарски пронаоѓач и индустријалец.