Серија А: Милан и Џенова одиграа без голови, Комо до победа над Рома со два гола во продолжението

Фудбалерите на Комо пред своите гледачи ја победија Рома со 2:0 (0-0) во 16. коло од италијанската Серија А, а двата гола домашните ги постигнаа во продолженијата на крајот од натпреварот.

Стрелец на водечкиот гол беше Алесандро Габриелони во 93. минута, а потоа во 97. минута му асистираше на Николас Паз за конечни 2:0. Со победата Комо стигна до 15 бодови и од 18. место скокна на 15. место. Рома има 16 бодови и е на 12. позиција.

Фудбалерите на Болоња пред своите навивачи ја победија Фиорентина со 1:0 (0:0). Стрелец на победничкиот гол беше Данецот Јенс Одгард во 59. минута. Болоња стигна до 25 бода и од осмото се искачи на седмото место на рангирањето. Фиорентина го претрпе само вториот пораз и остана на четвртата позиција со 31 бод. Лидерот Аталанта има 37 бода, два повеќе од второпласираниот Наполи.

Во Парма, Верона победи со 3:2 и се извлече од зоната за испаѓање. Копола (5), Сар (57) и Москера (75) беа стрелци за петтата победа на Верона сезонава, а двата гола за домашната екипа ги постигна Сом (19, 90). Верона сега се најде на 17. позиција со 15 бодови. Парма е на 14. место со исто толку бодови.

Фудбалерите на Лече ја победија Монца со 2:1 (2:1) во првиот натпревар од неделната програма. Во 3. минута Тете Моренте ги доведе домашните во водство, но во 13. минута Никола Крстовиќ промаши пенал за 2:0. Израмни Монца во 37. минута благодарение на автоголот на Патрик Доргу. Во 44. минута Крстовиќ се искупи за неискористениот пенал и постигна гол за да му донесе победа на Лече. Сега Лече со 16 бодови привремено е на 13. позиција, а Монца со осмиот пораз сезонава остана на 10 бодови и се наоѓа на претпоследното 19. место на табелата, со ист број бодови како и последната Венеција.