Светските берзи пораснаа трета седмица по ред, нови рекорди на Волстрит

Новите рекорди на S&P 500 и Nasdaq индексите најмногу се должат на порастот на цените на акциите на технолошките гиганти, како и на трговските синџири, бидејќи се очекува зголемување на расходите во периодот на празници и масовни патувања.

Седмицата најмногу помина во шпекулации за тоа дали американската централна банка ќе ги намали каматните стапки на дводневната седница од 17 до 18 декември. Економијата на САД постојано расте, пазарот на трудот останува цврст, а инфлацијата сè уште се движи над целта од 2 проценти.

Во средата, претседателот на Fed, Џером Пауел, порача дека економијата е посилна од очекуваното кога централната банка почна да ги намалува каматните стапки во септември, отворајќи го патот за побавно олабавување на монетарната политика. Сепак, пазарот сè уште очекува Fed да ги намали каматните стапки за 0,25 процентни поени на состанокот во декември.

Цените на акциите пораснаа и на европските берзи минатата недела. Лондонски FTSE индекс зајакна за 0,25 отсто, на 8.308 поени, додека франкфуртски DAX скокна за 3,9 отсто, на рекордни 20.384 поени, а париски CAC зајакна 2,6 отсто, на 7.426 поени.