Светските берзи пораснаа втора недела по ред

Поддршка за индексите даде и растот на трговскиот сектор, бидејќи се очекува зголемување на трошењата за празници, почнувајќи од „црниот петок“.

Минатата недела инвеститорите се фокусираа на новите макроекономски податоци кои покажаа дека американската економија продолжува да расте, а пазарот на трудот е солиден. Тоа значи дека американската централна банка не треба да брза со намалување на каматните стапки.

Дотолку повеќе што новите податоци покажаа дека инфлацијата не се намалува толку брзо како што се надеваа инвеститорите, па сѐ уште се движи над целните нивоа на Fed од 2 отсто.Поради сето ова, шпекулациите дека Fed ќе продолжи со агресивно намалување на каматните стапки стивнаа.

Мора да се признае, пазарот сè уште очекува Fed да ги намали каматните стапки за 0,25 процентни поени на состанокот во декември, но надежите дека ќе ги намали каматните стапки во јануари и март следната година исчезнаа.

„Се испостави дека инфлацијата е сè уште малку повисока отколку што би сакала Fed, па централната банка би можела да се одмори од намалувањето на каматните стапки. Се поставува и прашањето какво ќе биде влијанието на зголемувањето на царините, кое го најави новоизбраниот претседател на САД, Доналд Трамп. Ова може да ја поттикне инфлацијата, па Fed мора да ги балансира економските показатели со идните економски политики на Трамп“, вели Скот Велч, директор во компанијата „Certuity“.

Пазарите се поддржани и од надежите на инвеститорите за побрз економски раст следната година, со оглед на тоа што инфлацијата во светот се намалува, па многу централни банки ги намалуваат каматните стапки.

И на повеќето европски берзи цените на акциите пораснаа минатата недела. Лондонскиот FTSE индекс зајакна за 0,3 отсто, на 8.287 поени, а франкфуртски DAX за 1,6 отсто, на 19.626 поени. Парискиот CAC, пак, ослабе за 0,3 отсто, на 7.235 поени.