САД не планираат „ненадејно“ да се повлечат од Европа, вели Руте

САД долго време бараат европските земји од НАТО и Канада да трошат повеќе за својата одбрана. Руте ги поздрави напорите што веќе беа направени во изминатите неколку години, но потсети и дека треба да се направи повеќе.

Овој напор е „веројатно најголемото зголемување на трошоците за одбрана од европските земји на НАТО од крајот на Студената војна. Но, сè уште ни треба повеќе“, нагласи Руте.

Јасно кажавме дека остануваме во НАТО и ја поддржуваме алијансата, сакаме НАТО да биде силен и поживописен, да има повеќе капацитети, изјави американскиот државен секретар Марко Рубио по неговото пристигнување во седиштето на пактот во Брисел за учество на дводневниот состанок на министрите за надворешни работи на НАТО.

„САД се во НАТО и активни, како и секогаш. Хистеријата во медиумите, вклучително и во САД, е неоправдана, додаде тој, во врска со шпекулациите за можно повлекување на САД од алијансата. Богатите земји се способни да направат повеќе, инсистира Рубио на прашањето за трошоците за одбраната.

„Имаме потреби и дома, но приоритет ни е одбраната и го очекуваме истото од нашите партнери“, додаде тој.

Настаните од последните години и новата војна во Европа покажуваат дека сè уште треба да имаме моќна сила како услов за одвраќање. Секоја од земјите на НАТО мора да оствари трошоци за одбрана еднакви на пет проценти од БДП, вклучувајќи ги и Соединетите држави, рече Рубио.

Истакна дека претседателот Трамп се залагал за зголемување на трошоците во неговиот прв мандат и дека таа порака ја задржува и сега.

„Претседателот Трамп не е против НАТО“, резимираше Рубио.

Според него, никој не очекува за една година да се постигне целта од пет проценти од трошењето на БДП. Мораме да можеме да ја одбраниме нашата територија од каква било закана, додаде американскиот државен секретар.