САД го продолжија рокот за завршување на трансакциите со „Лукоил“

Двете земји одобрија ослободувања од санкции за голем број меѓународни проекти на „Лукоил“. Конзорциумот за Каспискиот гасовод е ослободен од санкциите на САД, додека британските санкции врз „Лукоил“ не го опфаќаат полето Карачаганак во Казахстан или полето Шах Дениз во Каспиското Море, според извештајот на руската новинска агенција ТАСС.

„Лукоил“ кон крајот на минатиот месец објави дека одлучил да продаде средства во странство поради санкциите и дека прифатил понуда од швајцарскиот мултинационален трговец со енергенси „Gunvor“. Оваа групација ја повлече својата понуда на почетокот од ноември откако Вашингтон сигнализираше дека нема да му биде доделена лиценца за работење сè додека не заврши војната во Украина.

Во четвртокот Reuters објави, повикувајќи се на три изворa запознаени со ова прашање, дека американскиот инвестициски фонд „Carlyle“, кој управува со средства во вредност од 474 милијарди долари, размислува да ги купи „во пакет“ странските средства на „Лукоил“.

Други компании претходно сигнализираа интерес за купување поединечни делови од средствата на „Лукоил“. Наводно, „Shell“ е заинтересиран за нафтените платформи на „Лукоил“ во територијалните води на Гана и Нигерија, изјавија два одделни извора за Reuters. „Shell“ одби да ги коментира овие информации. Турскиот „Cengiz Holding“, пак, соопшти дека нема намера да се откаже од планираното купување на бугарската рафинерија „Нефтохим Бургас“.

„Лукоил“ е во преговори со неколку потенцијални купувачи за продажба на своите меѓународни средства, соопшти руската компанија во петокот, нагласувајќи дека има намера да обезбеди континуитет на работењето на странските проекти за време на нивната продажба и пренос на сопственост за да се избегнат прекини во снабдувањето со енергија и да се зачуваат работните места.

Странските средства на „Лукоил“ вклучуваат рафинерии во Бугарија, Романија и Холандија, интереси во нафтени полиња во Казахстан, Узбекистан, Ирак, Мексико, Гана, Египет и Нигерија, како и широка мрежа од околу 2.500 малопродажни бензински пумпи во 19 земји.

Вкупно „Лукоил“ произведува околу 2 отсто од светската нафта, а 0,5 отсто од светската нафта се произведува во постројки надвор од нејзината матична земја.

Според извештаите на берзата од 2024 година, вредноста на странските средства на „Лукоил“ се проценува на околу 22 милијарди долари, објави Reuters.

Меѓународниот бизнис на „Лукоил“ се соочи со проблеми веднаш штом беа воведени санкции врз компанијата, забележува руската приватна новинска агенција Интерфакс. Минатата седмица, според извештаите во медиумите, компанијата прогласи „виша сила“ на нафтеното поле Западна Курна 2 во Ирак, едно од најголемите во светот. Руската компанија има 75 отсто удел во тоа поле.

Британската канцеларија за спроведување на финансиски санкции во петокот го продолжи рокот за трансакции со бугарските компании на „Лукоил“ до 14-ти февруари 2026 година. Руската компанија поседува рафинерија за нафта во Бургас и синџир од над 500 малопродажни бензински пумпи во земјата.