Проевропските социјалдемократи избија на врвот на парламентарните избори одржани во неделата во Романија, но крајната десница го потврди својот силен подем и ја доведе оваа членка на ЕУ и НАТО, која граничи со Украина, во еден вид неизвесност.
PSD, која досега владееше со либералите, освои 22,4 отсто од гласовите, престигнувајќи ги другите политички групи, според изборните резултати по пребројани над 99 отсто од гласовите.
Сепак, крајно десничарските сили заедно имаат повеќе од 31 отсто од гласовите, трипати повеќе отколку на изборите во 2020 година.
Изборите дојдоа една недела по изненадувачката победа на крајно десничарскиот независен кандидат Калин Џорџеску во првиот круг од претседателските избори, што ја зголеми загриженоста на Западот за стратешкото позиционирање на Романија.
Крајната десница, разединета во неколку групи, но обединета околу одбраната на „христијанските вредности“ и прекинот на помошта за Киев во име на „мирот“, не го крие задоволството од изборните резултати.
„Денес романскиот народ гласаше за суверенистите“, рече претседателот на Сојузот за обединување на Романија (AUR) Георге Симион. Неговата партија освои 17,8 отсто од гласовите.
„Ова е почеток на нова ера во која Романците го враќаат своето право сами да одлучуваат за својата судбина“, рече Симион, истакнувајќи дека излезноста на овие избори е 52 отсто, што е највисока во последните две децении.
Во истиот табор во парламентот влегоа и СОС Романија под диригентската палка на темпераментната Дијана Сосоака и целосно новата Младинска партија (POT) со 7,2 отсто и 6,3 отсто од гласовите.
Од падот на комунизмот во 1989 година, земјата немаше ваков развој на настаните, но поради економските тешкотии и војната од другата страна на границата, гневот на голем дел од 19-милионското население тлееше.
„Тој силен пораст на крајната десница, околу една третина од електоратот, е сведоштво за акумулираните фрустрации во општеството и незадоволството поради лошиот животен стандард“, коментира аналитичарот Раду Магдин.
Тој, сепак, смета дека доаѓањето на власт на крајната десница во никој случај не е загарантирано поради недостигот од сојузници.
Изборите се одржаа во тензична атмосфера откако Уставниот суд во четвртокот нареди пребројување на гласовите во првиот круг од претседателските избори, во пресудата за која набљудувачите велат дека ризикува да го наруши кредибилитетот на државните институции пред уште две гласање.
Независниот крајно десничарски политичар Калин Георгеску (62) оствари победа во првиот круг од претседателските избори, што покрена прашања за тоа како е можно вакво изненадување во Европската унија и земја членка на НАТО.
Тој доби многу гласови од млади гласачи и Романци кои живеат во странство, а неговата кампања во голема мера се потпираше на платформата TikTok, што ги натера романските власти да се сомневаат во руското влијание на изборите.
TikTok ги отфрли таквите грижи и рече дека повеќето кандидати воделе кампања на платформата, како и на други социјални мрежи.
Одлуката за пребројување на гласовите дојде откако конзервативниот претседателски кандидат Кристијан Терхес, кој освои еден процент од гласовите во неделата, го оспори резултатот од гласањето. Одлуката на Уставниот суд се очекува подоцна во понеделникот.
Доколку гласањето не биде поништено, вториот круг од претседателските избори ќе се одржи на 8 декември.
Слични новости
АЛДЕ иницира „санитарен кордон“ кон лидерот на нејзината бугарска членка ДПС
Алијансата на либералите и демократите за Европа (АЛДЕ) предложи воспоставување на „санитарен кордон“ кон лидерот на бугарското Движење за права и слободи – Нов почеток (ДПС-НН), Делјан Пеевски, кој од јуни 2021 година се наоѓа на американската „црна листа“ поради вмешаност во корупција.
Тензии во и пред Собранието на Војводина додека се гласаше за буџетот
Претставниците на опозицијата во Скупштината на Војводина во вторникот побараа оставки од претседателот на парламентот на Војводина, Балинт Јухас и од претседателката на покраинската влада, Маја Гојковиќ
Завршна декларација од Самитот ЕУ-Западен Балкан: Забрзувањето на пристапниот процес е заеднички интерес
Во текстот се посочува дека помирувањето, инклузивната регионална соработка и добрососедските односи се сржта на Европската Унија, па затоа од суштинско значење е спроведувањето на меѓународните договори со добра волја и со видливи резултати, вклучително и на Преспанскиот договор со Грција и Договорот за пријателство, добрососедство и соработка со Бугарија