Родителите и блиските на загинатите во трагедијата во кочанската дискотека„Пулс“ денеска повторно излегоа на протестен марш во Кочани.
„Маршот за ангелите“ започна во 14:05 часот, а колоната тргна од Паркот на револуцијата, помина низ централното градско подрачје, покрај Управата за јавни приходи и полициската станица, и заврши пред Основниот суд, каде родителите уште еднаш ги повторија своите барања за правда и одговорност.
Учесниците на маршот беа гласни дека очекуваат судење базирано на факти, а не, како што рекоа, на поетски метафори и реторика.
„Дали судницата се претвори во Струшки вечери на поезијата? Дали таму се оди за рецитирање или за вистина? Дали зборовите треба да ја покријат смртта на нашите деца? Според тоа што го слушаме, може да се помисли дека деца не загинале, дека пожар немало, дека никој не е виновен, дека трагедијата била случајна. Но вистината е сурова – нашите деца изгореа живи, во чад и паника, со крикови кои никој на време не ги слушна“, рече Александар Наунов, родител на девојка загината во „Пулс“.
Тој потсети дека Обвинителството поседува повеќе од 200 гигабајти доказен материјал – снимки, разговори, извештаи, вештачења и анализи.
Родителите најавија дека маршевите ќе продолжат и дека ќе го следат секое рочиште, „сè додека правдата не излезе на виделина“.
„Овој марш е за државата да почне да функционира, за институциите да не бидат празна форма, а функциите – само плата, туку и обврска“, истакна Наунов.
Во тек е судската постапка за пожарот во „Пулс“, во кој загинаа 63 лица, а над 200 беа повредени. Сите 35 обвинети физички лица се изјаснија дека не се чувствуваат виновни, а обвинетите компании ги отфрлаат наводите во обвинението.
Слични новости
Мицкоски: Не добив само реизбор, денес победи идејата за патот што го трасираме за Македонија
Не добив само реизбор како претседател на ВМРО-ДПМНЕ туку денеска победи идејата. Победи патот што го трасираме за Македонија. Честа е голема и обврската и долгот кон доделената задача уште поголема, истакна Христијан Мицкоски откако попладнево на партискиот конгрес што се одржува во Кавадарци беше реизбран за лидер на ВМРО-ДПМНЕ
Британска амбасада: Британско- македонското стратешко партнерство е фокусирано на продлабочување на економската и безбедносната соработка
Во врска со пишувања во некои британски медиуми и реакции во земјава за наводно отворање мигрантски кампови, Британската амбасада објави на социјалните мрежи статус со кој посочува дека двете земји имаат воспоставено Стратешко партнерство фокусирано на долгорочна политичка, економска и безбедносна рамка дизајнирана да ја продлабочи соработката и да ја зајакне стабилноста и просперитетот во двете земји
СДСМ: Не чисти СОЗР, „чисти“ семејната фирма на Томовски
Од државни институции и од општини, водени од ДПМНЕ, семејната фирма на Томовски која го менува името добила: неверојатни 5 милиони и 360 илјади евра или вкупно 161 тендери, порача на партиска конференција за медиумите Александар – Саша – Димитријевиќ, од Централен одбор на СДСМ