Речиси половина од Американците го сметаат трговскиот дефицит за знак на криза

Група предводена од синдикатот на Обединетите челичари и домашните производители изјави дека 40 отсто од анкетираните 2.202 возрасни лица веруваат дека трговските дефицити ѝ штетат на американската економија и ја поткопуваат националната безбедност.

Спротивно на тоа, 20 отсто ги гледаат трговските дефицити како знак на економска сила, при што силната побарувачка ја движи глобалната трговија.

Останатите 40 отсто или не мислат дека ниту една од тие проценки е точна или не мислат дека се доволно информирани за да го кажат тоа, соопшти групата.

Анкетата беше спроведена кон средината на октомври од страна на компанијата „Morning Consult“ и има маргина на грешка од плус или минус два отстони поени.

Врховниот суд ќе ги слушне усно аргументите во среда за легалноста на царините што Трамп ги воведе на речиси секоја земја. Понискиот суд пресуди дека претседателот ги пречекорил своите овластувања во повеќето царини, повикувајќи се на Законот за меѓународни економски овластувања во вонредни состојби од 1977 година (IEEPA).

Трамп е првиот претседател што при воведувањето на царините се повика законот, тврдејќи дека трговскиот дефицит на САД од 1,2 трилиони долари во 2024 година значи дека земјата е во криза.

Законот за вонредни овластувања беше најбрзата опција на Трамп за воведувањето царини на земјите со кои САД имаат долгогодишен трговски дефицит и за одделни давачки за Кина, Канада и Мексико за сузбивање на нелегалната трговија со фентанил и други нелегални дроги.

Доколку Врховниот суд ги укине царините, предупреди министерот за финансии Скот Бесент во едно од скорешните интервјуа, владата едноставно ќе прибегне кон други овластувања за воведување царини, вклучително и Членот 122 од Законот за трговија од 1974 година, кој дозволува генерални тарифи од 15 отсто во текот на 150 дена за решавање на трговските нерамнотежи.