Раст на европските берзи

Најмногу претпладнево поскапеа цените на акциите во одбранбениот сектор, во просек за 6 отсто, откако лидерите на Европската унија и Велика Британија во неделата најавија поголеми инвестиции во одбраната. Тие, исто така, најавија дополнителна помош за Украина во нејзината војна со Русија, откако разговорите меѓу американскиот претседател Доналд Трамп и украинскиот претседател Володимир Зеленски пропаднаа во Белата куќа во петокот.

Цените на акциите пораснаа и на азиските берзи. Индексот на азиските акции MSCI беше во плус 0,3 отсто во истиот пресек како и во Европа. Јапонскиот индекс Nikkei порасна за 1,7 отсто, додека цените на акциите во Хонгконг и Австралија пораснаа меѓу 0,3 и 0,9 отсто. Во Шангај, пак, благо паднаа, додека Јужна Кореја е затворена за празниците.

Растот на берзанските индекси главно се должи на корекцијата на цените на акциите по минатонеделниот пад.

Инвеститорите се претпазливи откако американскиот претседател Доналд Трамп објави дека на почетокот на оваа седмица ќе стапат на сила царините од 25 отсто за увозот од Канада и Мексико. Тој најави и нови царини од 10 отсто за увозот од Кина, иако веќе пред еден месец беа воведени царини од 10 отсто.

Според кинеските медиуми, Пекинг подготвува одговор – список на американски производи, вклучително и земјоделски производи, на кои ќе воведе царини и други увозни ограничувања.

Ова е причината зошто инвеститорите стравуваат од трговска војна, која негативно ќе влијае на меѓународната трговија и на целата глобална економија.