Гигантската ракета „New Glenn“ на компанијата „Blue Origin“ на милијардерот Џеф Безос полета од Флорида во четврток на својата дебитантска комерцијална мисија, испраќајќи два сателита на американската агенција за вселенски истражувања NASA кон Марс и првпат успешно приземјувајќи ја првата фаза на ракетата за повеќекратна употреба.
Првиот лет на моќната двостепена ракета од нејзиното пробно лансирање во јануари и успешното слетување на првата фаза на море се клучни пресвртници за „Blue Origin“ додека се стреми поблиску да се натпреварува со „SpaceX“ на Елон Маск, водечката светска компанија за лансирање ракети.
Веб-пренос во живо од „Blue Origin“ ја покажа ракетата како се издига од лансирната кула низ ведро попладневно небо во грмотевици од пламен и облаци од пареа.
Лансирањето следеше по неколкудневни одложувања поради облачно небо и геомагнетна бура. Околу 10 минути по лансирањето, ракетата „New Glenn“ висока 17 ката направи враќање на морска платформа, именувана како Џеклин во чест на мајката на Безос, лебдејќи во Атлантикот, постигнувајќи за „Blue Origin“ важен подвиг на повторна употреба што го започна „SpaceX“.
Првиот обид за такво слетување во јануари не успеа. Со лансирањето во четврток, вселенското летало „EscaPADE“ (кратенки за Escape и Plasma Acceleration and Dynamics Explorers) на NASA стана првиот научен товар што „Blue Origin““ го достави во вселената за NASA или за кој и да е друг клиент.
„Денес постигнавме целосен успех на мисијата и многу сум горд на тимот“, рече Дејв Лимп, извршен директор на „Blue Origin“.
Маск го призна достигнувањето на „Blue Origin“, објавувајќи на својата платформа на социјалните медиуми X: „Честитки до @JeffBezos и тимот на @Blue Origin!“
Во ракетниот парк на „Blue Origin“ во Кејп Канаверал, се слушаа навивања додека видеото го прикажуваше слетувањето на првата фаза на ракетата, наречена „Never Tell Me the Odds“, референца на реплика што ја изговорил херојот на „Војна на ѕвездите“ Хан Соло во „Империјата возвраќа ударот“.
Околу 20 минути подоцна, контролата на мисијата потврди дека горната фаза на „New Glenn“ ја исполнила својата примарна мисија – испраќање на вселенското летало „EscaPADE“ во вселената за да се впушти во 22-месечно патување до Марс.
Двојнните вселенски летала, наречени „Blue“ и „Gold“, треба да пристигнат на Марс во 2027 година и да влезат во синхронизирани елиптични орбити за 11-месечно проучување на вселенската временска средина на планетата.
Инструментите на сателитите ќе анализираат како сончевите ветрови – флуктуирачки потоци од високоенергетски наелектризирани честички од Сонцето – комуницираат со релативно слабото магнетно поле на Марс и како оваа интеракција придонела за осиромашување на тенката марсовска атмосфера. Наодите ќе помогнат да се објасни зошто Марс, некогаш потопол и повлажн, станал пустинска планета и како сончевото зрачење влијае на површината на Црвената планета.
„EscaPADE“ првично беше закажано да се лансира во октомври 2024 година, но мисијата беше одложена поради доцнења во развојот на ракетата „New Glenn“.
Сателитите „Blue“ и „Gold“ беа изградени за NASA од страна на калифорниската воздухопловна компанија „Rocket Lab“, а инструментите беа обезбедени од Универзитетот во Калифорнија, Беркли.
Компанијата „Blue Origin“, основана од Безос во 2000 година, до неодамна беше позната главно по својот бизнис за вселенски туризам, кој транспортира богати патници до работ на вселената во својата суборбитална ракета „New Shepard“. Едностепеното, повеќекратно употребливо вселенско летало, исто така, спроведе повеќе од 200 научни експерименти во својата капсула.
„Blue Origin“ потроши милијарди долари за развој на „New Glenn“, ракета со тежок товар дизајнирана да стане главно лансирно возило на компанијата за превоз на луѓе и товар во орбитата.
Именуван по Џон Глен, првиот Американец што ја орбитира Земјата, вселенското летало произведува двојно поголем потисок при лансирањето од ракетата „Falcon 9“ на „SpaceX“ и приближно исто како и „Falcon Heavy“ на „SpaceX“, додека нуди повеќе простор за товар од своите конкуренти.
NASA потроши околу 55 милиони долари за мисијата „EscaPADE“, скромна цена во споредба со другите вселенски програми на агенцијата вредни милијарди долари, и му плати на „Blue Origin“ 18 милиони долари за летот на „New Glenn“, покажуваат федералните записи за набавки.
Слични новости
Претседателот Доналд Трамп ќе биде во улога на шоумен и домаќин на церемонијата на доделување на почесните награди во Кенеди центарот
Сум ги гледал досегашните водители. Ако не можам да го надминам Џими Кимел во талентот, тогаш и не заслужувам да бидам претседател, изјави Трамп.
Зоотопиа 2 се приближува до заработка од една милијарда долари
Анимацискиот феномен на студиото Волт Дизни „Зоотопиа 2“ надвор од САД стана најсупешниот филм оваа година со заработка од дури 695,3 милиони долари за две недели прикажување.
Хоророт „Петте ноќи кај Фреди“ прв на американскиот Бокс Офис
Секвелот на Блумхаус хорор филмот „Петте ноќи кај Фреди“ викендов заработи 63 милиони долари на кино благајните во САД, што е најдобро отварање на филм во викенд по празничниот продолжен викенд за Денот на благодарноста.