Рускиот претседател Владимир Путин во петокот рече дека тој и Доналд Трамп би требало да се сретнат за да разговараат за војната во Украина и цените на енергенсите, прашања што американскиот претседател ги истакна во првите пет дена од неговата нова администрација.
Путин во изјавата за телевизискиот канал Россия 1, сепак, рече дека не може да има сериозни мировни преговори со Украина, освен ако Западот не го притисне претседателот Володимир Зеленски за да го поништи декретот од 2022 година со кој му се забранува да преговара со рускиот челник.
„Отсекогаш велевме, сакам уште еднаш да нагласам: подготвени сме за овие преговори за украинското прашање, но и тука има прашања кои бараат посебно внимание. На пример, како што е познато, актуелниот шеф на режимот во Киев, кога сè уште беше прилично легитимен шеф на државата, издаде декрет за забрана на преговорите“, рече Путин алудирајќи на тоа што минатата година истече претседателскиот мандат на Зеленски.
Путин го опиша Трамп, кој оваа седмица ѝ се закани на Русија со нови санкции и царини доколку не преговара за крај на војната, како „паметен и прагматичен“. Тој рече дека не очекува американскиот претседател да носи одлуки за санкции кои би влијаеле на американската економија.
„Затоа, најверојатно ќе биде подобро за нас да се сретнеме, врз основа на денешните реалности, мирно да разговараме за сите оние области важни за САД и за Русија. Ние сме подготвени“, рече Путин додавајќи дека тоа зависи од избор на американската страна.
Агенцијата Reuters оценува дека ова е најсилниот показател досега од Кремљ дека посакува скорешен самит со Трамп по трите години практично никаков контакт на високо ниво со западните челници поради војната во Украина.
Путин рече дека отсекогаш имал „прагматичен, доверлив однос“ со Трамп. Тој, исто така, изрази поддршка за тврдењето на Трамп дека тој а не Џо Бајден е вистинскиот победник на американските избори во 2020 година.
„Не можам да не се согласувам со него дека ако беше избран за претседател, ако не му беше украдена победата во 2020 година, тогаш можеби немаше да има криза во Украина што се појави во 2022 година“, рече лидерот на Кремљ.
Слични новости
Трамп предлага трајно раселување на жителите на Газа
Трамп го повтори својот повик до Јордан, Египет и другите арапски држави да ги примат жителите на Газа, велејќи дека Палестинците таму немаат друг избор освен да го напуштат крајбрежниот појас
ЕУ сака праговори со САД за спречување на царините на Трамп
Европската унија сака брзо да влезе во дијалог со САД во врска со планираните царини на претседателот Доналд Трамп, изјави во вторникот европскиот комесар за трговија Марош Шефчович, додека претседателката на Европската комисија, Урсула фон дер Лајен заклучи дека преговорите ќе бидат тешки
Ердоган и Шара во Анкара разговараа за чекори против курдските борци
На заедничката прес-конференција во Анкара, Ердоган рече дека Турција е подготвена да му помогне на новиот врв на Сирија во борбата против Исламската држава и курдските милитанти