Проценката за вишокот ја намали цената на нафтата под 73 долари

Во средата, најавите на Европската унија за нови санкции за руската нафта, кои би можеле да ја ограничат понудата, го привлекоа вниманието на пазарот. Во средата амбасадорите на ЕУ се договорија за 15-от пакет санкции против Русија поради војната во Украина, објави унгарското претседателство.

„Задоволна сум што беше усвоен 15-от пакет санкции, чија цел е првенствено руската ‘сива флота’“, напиша претседателката на Европската комисија, Урсула фон дер Лајен на X.

Русија го заобиколува ценовниот лимит на Г7 од 60 долари за барел со „сивата флота“, која им забранува на превозниците и на осигурителните компании да сервисираат поскапи руски барели. Но, забележливо е дека западните земји ги купуваат руските барели од трети земји и наводно преработени ги пласираат на пазарите по повисоки цени.

„Овој потег повторно истакна дека сериозно се сака да се ограничи снабдувањето со руска нафта, што би можело да ги поддржи цените и ја потисна во среддата во втор план ‘традиционалната метрика на побарувачката’“, вели Џон Килдафф од „Again Capital“.

Во четвртокот, вниманието повторно се сврте кон побарувачката.

Меѓународната агенција за енергија (IEA) благо ги зголеми проценките за растот на побарувачката за оваа и за следната година, но нагласи дека понудата ќе порасне уште посилно благодарение на групата независни производители предводени од САД. Во такви услови пазарот во 2025 година би требало да забележи вишок од речиси милион барели дневно, пресметале во IEA.

Трговците најмногу ги загрижува слабеењето на побарувачката во Кина поради забавувањето на економската активност и преминот кон почисти горива.

Во четвртокот, индициите за послаба побарувачка во САД, исто така, ги загрижија.

Залихите на бензин минатата седмици се зголемени за дури 5,1 милиони барели, а залихите на дестилати за 3,2 милиони барели, покажаа податоците на Министерството за енергетика.