Иако нема да има предвремени избори Македонија на пролет ја очекуваат претседателски и парламентарни избори. Дејствувањето на политичките чинители е детерминирано од предизборното расположение, независно што официјално предизборниот период не е отпочнат. Но, како што еднаш ми рече искусен претседател на изборен штаб на голема политичка партија, „ако теренот не е изоран најмалку шест месеци пред избори, нема што да бараш на изборите“.
Клучното прашање е дали претседателските и парламентарните избори ќе бидат одржани заедно или прво ќе има претседателски, а потоа парламентарни избори. Опозицијата ќе настојува изборите да се одржат симултано поради цензусот на претседателските избори, бидејќи ако едновремено со парламентарните избори не се одржат и претседателските, а партиите од албанскиот политички блок немаат свои кандидати и интерес за вториот круг од гласањето, цензусот може да не биде исполнет.
Освен овие практични, и уставни прашања, во игра се секогаш и политичките калкулации. Владејачкиот СДСМ ќе инсистира на одвоени избори. Тоа им е единствена шанса за да бидат колку-толку конкурентни во изборната трка. СДСМ само по себе, со овие рејтинзи убедливо ќе ги загуби изборите. Калкулациите на СДСМ се ефектуирање на коалицијата со ДУИ. Ако во вториот круг од изборите нивниот кандидат добие значаен контингент гласови од коалицискиот партнер ДУИ, имаат шанса да ги добијат претседателските избори. Опцијата за заеднички претседателски кандидат, исто така е на маса.
Евентуална победа на претседателските избори, за која СДСМ има мали шанси дури и со поддршката на ДУИ, би им донела две големи политички предности. Прво, психологијата на избирачите е да се приклонуваат кон победникот, па евентуална победа на претседателските избори би им донела „ветер во грб“ на парламентарните избори. Второ, ако ги добијат претседателските избори би задржале барем една полуга од извршната власт, во ситуација кога се соочени да ги загубат и премиерската и претседателската функција.
ДУИ, бездруго има сопствена математика. Прво, не е јасно до колкава мерка се подготвени да ризикуваат пораз, спасувајќи го СДСМ. Второ: Ако се одржуваат избори во услови кога владата ќе ја води технички премиер Албанец, претседател на Собранието е Талат Џафери, исто така Албанец, ако нема цензус, тој човек по Уставот, ќе ја обавува и фунцијата претседател на државата до избор на нов, ако на вториот круг од претседателските избори нема цензус. Некои аналитичари сметаат дека ДУИ нема да ја пропушти шансата, да излезе на избори пред сопствениот електорат со концентрација на трите клучни функции во државата во нивни раце.
Лидерот на ВМРО-ДПМНЕ Христијан Мицкоски бара лидерска средба, за да се определат датумите за изборите, и да се расчисти сликата и неизвесностите околу изборите, но Димитар Ковачевски одбива таква лидерска средба. Негов интерес се уставните измени. На Ковачевски, но и на целата СДСМ им е јасно дека евентуални уставни измени се Game changer пред претстојните избори. Се разбира дека тоа им е јасно и во ВМРО-ДПМНЕ кои по шест години минати во опозиција сигурно нема да влезат во изборно самоубиство што за нив би била поддршката на уставните измени. Предолго, пречесто и со широка аргументација ВМРО ДПМНЕ образложуваше зошто нема шанса овој парламентарен состав да ги изгласа уставните измени. Ако сега ретерираат од тие позиции, ќе ги разочараат нивните гласачи, и потоа изборите би биле сосема неизвесни. Но, такво нешто нема да се случи.
Како што стојат работите ВМРО-ДПМНЕ е блиску до бројката од 50+ пратеници на изборите, кои заедно со здружената опозиција на албанските партии, и евентуални независни пратеници (Максим Димитриевски) би им ги донеле потребните бројки за формирање влада. Левица, нема да биде дел од новата влада, во спротивно, владата од старт крајно ќе ги влоши односите со меѓународниот фактор.
СДСМ е спаднато на бројка од 30-ина пратеници. Смешните анкети што ги лиферуваат по нивни медиуми дека тие се прва партија, затоа што Никола Груевски ги дели гласовите на ВМРО-ДПМНЕ се патетичен обид за некаков спин во јавноста пред изборите. Какви времиња дојдоа: Оние што истражуваа и разоткриваа дека не постојат фантомските агенции за истражување на рејтинзите од типот на „Димитрие Чуповски“, сега да го прават она против кое што се бореа и го исмеваа.
Слични новости
Либералната демократија се проголтува самата себе
Ако во еден момент престанат разликите меѓу политиките на САД, наспроти Кина или Русија, западните вредности, како демократијата, владеењето на правото, човековите права, слободата на говорот, ќе бидат крајно загрозени, или сосема ќе исчезнат.
Победата на Трамп и кризата на традиционалните медиуми
Кампањата на Трамп не беше фокусирана дури ни кај традиционалните медиуми кои го поддржуваат како медиумите на Руперт Мардок. Очигледно е дека Трамп и неговите советници за кампања и медиуми подобро и повеќе знаеја која е Америка, што гледа и што слуша, откако нивната стратегија доби јасна верификација со изборниот резултат.
Силата на новата десница
Можеби најзначајно од се во идеолошка смисла, е паѓањето, или барем поместувањето на таканаречениот „санитарен кордон“ околу есктремната десница.