Полска се подготвува да ја наследи Унгарија на чело на ЕУ

„Би требало да ги поттикнуваме нашите односи со САД, но Европа мора да стане независна и мора да застане на сопствени нозе. Сега е време да се заврши ерата на стравот од Русија и од неизвесноста“, порача Доналд Туск.

За време на состонокот на Европскиот економски и социјален комитет во Варшава, Магдалена Чарнецка објасни дека полското претседавање ќе се однесува не само на јакнењето на воената безбедност во ЕУ, туку и на енергетската, економската, прехранбената, климатската, здравстевната и информатичката сфера.

Не е случајно што Полска како прироитетна тема ја поставува безбедноста. Полска се граничи со Русија и Белорусија, две земји кои имаат отворени непријателски односи кон ЕУ. 

Варшава во последните две и пол години на форумите на ЕУ постојано се ангажираше на промоција на јакнењето на заедничката безбедност против Русија и стана гласен заговорник на повторно вооружување на Европа.

Полска за втор пат во својата историја го презема претседателството со ЕУ и сака да докаже дека веќе не е „чирак“ во рамките на ЕУ. Ќе се обиде да ја искористи слабоста на „европскиот мотор“ Франција и Германија, кои се соочуваат со домашни политички кризи, за да демонстрира силно лидерство во Советот на ЕУ. Иако претседателството со ЕУ има симболично значење, во ситуација кога Франција има слаба влада без јасно мнозинство, а Германија оди на вонредни парламентарни избори, тоа е совршена прилика за Варшава во европските рамки.

Туск се наоѓа во уникатна ситуација затоа што е единствениот центристички лидер на голема држава членка на ЕУ. „Полското претседавање со ЕУ ќе биде контрапункт на она што се случуваше во изминатите шест месеци“, предвидува стручњакот за Источна Европа Кај-Олаф Ланг од Германскиот инситут за надворешни работи во Берлин. Тоа пред се, се однесува на безбедносната политика на ЕУ и односите на Брисел со Киев и Москва.

Полскиот премиер Доналд Туск е близок со шефицата на Европската комисија Урсула фон дер Лејен и е многу искусен европски политичар. Како претседател на Европскиот совет од 2014-2019, а потоа и како претседател на ЕПП, добро ги запозна бриселските коридори на моќта.

Полска предничи во погледот на одвојувањето средства за одбрана во однос на другите европски сојузници во НАТО. Во моментов издвојува 4,2 насто од БДП-то за одбрана и има намера тоа да го зголеми на 4,75 во 2025.

Ова не е само силен аргумент што треба да им се изнесе на другите држави во ЕУ, туку и за идните разговори со новоизбраниот претседател на САД Доналд Трамп, кој повика на поголема посветеност во одбраната на своите европски партнери.