НБА клубот Њу Орлеанс Пеликанс го отпуштија главниот тренер Вили Грин, објави во саботата извршниот потпретседател за кошаркарски операции Џо Думарс.
Поранешниот заменик-главен тренер Џејмс Алберт Борего е назначен за привремен главен тренер на тимот, кој е на последното место во Западната конференција на НБА лигата со сооднос победи и порази од 2-12.
„По внимателна евалуација, донесовме тешка одлука да го смениме главниот тренер. Имам најголема почит кон Вили Грин и навистина го ценам неговиот придонес во организацијата Пеликанс и заедницата на Њу Орлеанс. Му посакуваме нему и на неговото семејство се најдобро во иднина“, напиша Џо Думарс во официјално соопштение.
Вили Грин ја започна својата тренерска кариера во НБА во 2016 година како помошник тренер во Голден Стејт Вориорс, а од 2019 година помина две сезони во Феникс Санс асистирајќи му на Монти Вилијамс. Во јули 2021 година, Њу Орлеанс Пеликанс го назначија тогаш 40-годишниот кошаркарски стручњак за главен тренер.
Во четири цели сезони под негово водство, тимот постигна 148 победи и доживеа 180 порази во регуларната сезона, а Пеликанс двапати се пласираа во плејофот во тој период (2022 и 2024 година), но двата пати беа елиминирани во првото коло.
„Џо Думарс е задолжен за одлуките за кошаркарските операции и како еден од најдобрите умови во кошарката, му верувам дека ќе ги донесе правилните одлуки за нашиот клуб“, изјави сопственичката на Пеликанс, Гејл Бенсон.
„Имам огромно восхитување и почит кон Вили Грин и навистина ценам сè што направи за нашата организација во изминатите неколку години. Ова е тешка работа и ова се тешки одлуки. Моите очекувања се да бидеме победнички тим кој се натпреварува за трофеи и останувам цврст во нашата посветеност на градење висококвалитетна организација за нашите играчи, партнери и, најважно, за нашите навивачи“, додаде Бенсон.
Слични новости
Преглед НБА: Оклахома продолжува со победите
Оклахома Сити Тандер ја забележаа својата 14-та последователна победа победувајќи ги Далас Маверикс со 132:111 дома
Извлечени групите за Светското првенство 2026
Жрепката за Светското фудбалско првенство во 2026 година во Вашингтон беше спектакл во холивудски стил, експлозија од гламур, црвени теписи и мноштво светски ѕвезди, а Македонија доколку го мине плејофот против Данска а потоа биде подобра и во соочувањето со победникот од дуелот меѓу Чешка и Ирска ќе се најде во групата А
Трамп ја доби Наградата за мир на ФИФА
Американскиот претседател Доналд Трамп ја доби наградата за мир, која првпат годинава ја доделува светската фудбалска федерација ФИФА