На Волстрит индексот S&P 500 падна четврти ден со ред во вторникот, а и другите берзански индекси, исто така паднаа, главно поради натамошниот пад на цените на акциите на големите технолошки компании.
Индексот Dow Jones се лизна за 1,07 отсто на 46.091 поен, додека S&P 500 падна за 0,83 отсто на 6.617 поени, а индексот Nasdaq потона за 1,21 отсто на 22.432 поени.
Вчера, како и претходните денови, технолошкиот сектор беше под најголем притисок, бидејќи инвеститорите стравуваат дека цените на акциите во тој сектор се преценети.
Секторот долго време расте силно, благодарение на еуфоријата околу развојот на вештачката интелигенција, но сега некои инвеститори веруваат дека цените на технолошките акции се превисоки, па затоа го префрлаат капиталот од него во други сектори.
Цените на акциите на „Nvidia“, „Microsoft“ и „Amazon“, меѓу другите, вчера паднаа за меѓу 3 и 4 отсто. Инвеститорите се претпазливи и бидејќи кварталниот деловен извештај на „Nvidia“, најголемата компанија во светот по пазарна вредност, ќе биде објавен подоцна во среда, што би можело значително да влијае на целиот технолошки сектор.
Извештајот на „Nvidia“ би можел да покаже дали цената на акциите на производителот на чипови е одржлива. Од лансирањето на ChatGPT во ноември 2022 година, цената на „Nvidia“ се зголеми за околу 1.000 отсто, а од почетокот на оваа година за повеќе од 40 отсто, па пазарната вредност на компанијата неодамна надмина 5.000 милијарди долари.
Инвеститорите, исто така, се претпазливи бидејќи оваа седмица се очекуваат неколку важни макроекономски извештаи, вклучувајќи ја и септемвриската вработеност, која ќе ја покаже состојбата на американската економија.
Поради затворањето на американските федерални агенции, нема официјални извештаи од 1-ви октомври, па инвеститорите се нетрпеливи да видат дали официјалниот извештај ќе покаже дека пазарот на трудот слабее, како што покажаа помалку сеопфатните извештаи од приватните институции последните седмици.
Пазарот е негативно погоден и од неизвесноста во врска со каматните стапки на американската централна банка. До неодамна се очекуваше дека Fed ќе ги намали каматните стапки за 0,25 отстотни поени во декември, како што направи во септември и октомври. Сепак, ова станува сѐ помалку сигурно, бидејќи многу челници на Fed претпазливо велат дека инфлацијата е сè уште далеку над целните нивоа од околу 2 отсто.
Цените на акциите на европските берзи, исто така, паднаа вчера. Лондонскиот индекс FTSE се лизна за 1,27 отсто, на 9.552 поени, додека франкфуртскиот DAX потона за 1,74 отсто, на 23.180 поени, а парискиот CAC за 1,86 отсто, на 7.967 поени.
Слични новости
„Аmazon“ со уплата од 180 милиони евра ја затвори истрагата за можна дночна измама во Италија
Подружница на американскиот гигант за е-трговија „Amazon“ им плати околу 180 милиони евра на италијанските даночни власти и го укина својот систем за следење на испораките со цел да ја затвори истрагата за можна даночна измама и експлоатација на работници
Цените на храната паднаа и во ноември
Цените на храната паднаа и во ноември, трет месец по ред, со значително намалување на цената на млекото и млечните производи и растителните масла, објави во петокот агенцијата за храна и земјоделство на Обединетите нации
РКЕ ги намали надоместоците за дистрибуција, пренос и за операторот на пазарот на електрична енергија
Регулаторната комисија за енергетика (РКЕ) за 3,64 отсто го намали надоместокот за дистрибуција на електрична енергија, односно за користење на електродистрибутивниот систем на Електродистрибуција од 1 јануари 2026 година