Европските берзи паднаа во четвртокот во претпладневното тргување бидејќи инвеститорите стравуваат од трговска војна откако американскиот претседател Доналд Трамп ѝ се закани на Европската унија со царини за сите увозни производи.
Индексот STOXX 600 на водечките европски акции во првиот дневен пресек од тргувањето беше во минус за 0,6 отсто, губејќи дел од вчерашните добивки. Претпладнево лондонскиот FTSE индекс се намали за 0,26 отсто, на 8.708 поени, додека франкфуртски DAX за 1,01 отсто, на 22.565 поени, а париски CAC за 0,60 отсто, на 8.095 поени.
Во исто време, цените на акциите паднаа во сите сектори. Тоа е последица на вчерашната порака на Трамп дека многу брзо може да воведе царини од 25 отсто за увоз на автомобили и сите други производи од Европската унија. Европската комисија, пак, најави брза реакција, а на повидок е трговска војна, која може негативно да се одрази на растот на овие земји, но и на целата глобална економија.
И на азиските берзи се тргува претпазливо. Азискиот берзански индекс MSCI беше речиси непроменет од вчера. Јапонскиот индекс Nikkei порасна за 0,3 отсто, а за исто толку пораснаа и цените на акциите во Австралија и Шангај. Во Хонгконг и Јужна Кореја, пак, тие паднаа меѓу 0,3 и 0,7 отсто.
Азиските берзи се претпазливи, како што беше случајот вчера на Волстрит, кога индексот Dow Jones падна за 0,43 отсто, додека S&P 500 порасна за 0,01 отсто, а индексот Nasdaq за 0,26 отсто.
Од утрово порастот на технолошкиот сектор заглави на азиските берзи бидејќи инвеститорите не беа импресионирани од кварталните деловни резултати на „Nvidia“, најголемиот светски производител на чипови за вештачка интелигенција.
Приходите и заработката на технолошкиот гигант се во согласност со очекувањата, додека деловните проценки за првиот квартал од оваа година се малку над очекувањата. И покрај ова, цената на акцијата на „Nvidia“ утрово благо падна, откако вчера порасна за повеќе од 3,5 отсто.
Инвеститорите се исто така претпазливи бидејќи серија неодамнешни макроекономски податоци укажуваат на слабеење на американската економија, а бидејќи инфлацијата е висока, американската централна банка не се очекува да продолжи со намалувањето на каматните стапки во скоро време.
Слични новости
Германскиот производител на оружје го престигна VW по пазарна капитализација
Најголемиот европски производител на оружје „Rheinmetall“ го престигна водечкиот европски производител на автомобили „Volkswagen“ (VW) по пазарна капитализација во четвртокот на бранот побарувачка за акции во компаниите во секторот, предизвикан од најавата за повисоки трошоци за одбраната во Европа
Нафтата поевтини кон 70 долари
Цените на нафтата паднаа до 70 долари на меѓународните пазари во четвртокот, бидејќи инвеститорите беа преокупирани со најавите за нови царини, засенувајќи ги знаците за поголема побарувачка во САД
Трамп се закани со царини од 200 отсто за алкохолите, ако ЕУ не ги укине царините за виски
Американскиот претседател Доналд Трамп во четвртокот изјави дека ќе воведе царини од 200 отсто за сите вина и други алкохолни производи од Европската унија, доколку Унијата не ги укине царините за американското виски