Европските берзи остро паднаа во понеделникот наутро, бидејќи инвеститорите стравуваа од трговска војна, откако Вашингтон воведе царини на увозот од Канада, Мексико и Кина, а исто така и се закани на Европската унија.
Индексот STOXX 600 на водечките европски акции беше намален за 1,3 отсто претпладнето, лизгајќи се од рекордно високо ниво. Лондонски FTSE индекс се намали за 1,17 отсто, на 8.570 поени, додека франкфуртски DAX потона за 1,98 отсто, на 21.300 поени, а париски CAC 1,94 отсто, на 7.795 поени.
Најмногу претпладнево паднаа цените на акциите во автомобилскиот сектор, во просек за околу 4 отсто, додека технолошкиот, индустрискиот и рударскиот сектор паднаа за повеќе од 2 отсто.
Цените на акциите драстично паднаа и на азиските берзи. Јапонскиот индекс Nikkei во истиот момент од тргувањето како и во Европа беше намален за 2,7 отсто, додека цените на акциите во Хонгконг, Австралија и Јужна Кореја паднаа меѓу 0,2 и 2,5 отсто.
Кинеските берзи сѐ уште се затворени поради прославата на Лунарната Нова Година.
Остриот пад на цените на акциите е последица на одлуката на американскиот претседател да воведе царини. По долгогодишните закани, Трамп во текот на викендот потпиша извршна наредба за воведување царини од 25 отсто за увоз на стоки од Мексико и Канада и 10 отсто за кинески производи. Оваа одлука ќе се применува од вторник.
Сите три земји веднаш најавија контрамерки, поради што инвеститорите стравуваат од трговска војна. Трамп, исто така, рече дека наскоро планира да воведе царини за увозот од Европската унија.
Поради сево ова нагло паднаа и американските фјучерси индекси, па попладнево се очекува пад на цените на акциите на Волстрит. Во моментов, фјучерсите на индексот S&P 500 се намалени за 1,9 отсто, а Nasdaq за повеќе од 2 отсто.
„Потегот на Трамп е првиот удар во она што може да прерасне во катастрофална глобална трговска војна и да предизвика инфлацијата во САД да расте побрзо и повисоко отколку што првично проценувавме“, рече Пол Ешворт, аналитичар во „Capital Economics“.
Грег Дако, главен економист во EY, проценува дека воведувањето тарифи ќе резултира со намалување на економскиот раст на САД оваа година за 1,5 процентни поени и веројатно ќе доведе до стагфлација, истовремено туркајќи ги Канада и Мексико во рецесија.
Тоа секако ќе предизвика пад на приходите и заработката на компаниите, па може да се очекува многу нестабилно тргување на најголемите светски берзи во наредните денови, велат аналитичарите.
Слични новости
Цените на гасот во Европа на највисоко ниво од есента 2023.
Цените на гасот во Европа во понеделникот го достигнаа своето највисоко ниво за нешто повеќе од една година, со зголемена побарувачка поради ниските температури и укинувањето на ценовната граница ширум Европската унија
Минималната кошница ќе ја формираат сикдикатите, ДЗС, ОПМ и министерствата за финансии и за економија
Не е постигнат договор за минималната плата, но ќе има официјална потрошувачка кошница што ќе ја креираат синдикатите, Државниот завод за статистика, Организација на потрошувачи, како и министерствата за економија и за финансии
Aнгеловска-Бежоска: Реформите се важен фактор за привлекувањето странски инвестиции
Реформите, вклучувајќи го и усогласувањето на нашата регулатива и практики со европските, се значаен фактор за привлекување странски директни инвестиции. А странските директни инвестиции во малите економии како нашата вообичаено се еден од двигателите на економскиот раст“, истакна гувернерката на Народната банка