Сигурно е многу тешко да се најде понеспособна влада од онаа што во моментов ја води Македонија, било каде на мапата на светот. Таква неспособност и некадарност, одговорно тврдам дека досега не е видена.
Против волјата на народот, на неуспешен референдум, оваа влада, со целосно дерогирање на демократијата, претварање на парламентот во Акшам -пазар, поткуп на пратеници, сомнителни амнестии, уцени и којзнае какви се не срамни пазарења, стаса до потребните 80 пратеници за да го промени Уставот и името на државата, пред цели шест години. Имаше шест години на располагање без никој да почувствува, да ги замени патните исправи, на и онака огорчените граѓани.
Но, власта упорно си издаваше патни исправи со Република Македонија. Немале обрасци !!! Па кој да им даде соодветни обрасци? Кој треба да ги набави? За што земаат плата од буџетот ? Јас лично имам пасош издаден во средината на 2020 издаден од МВР во траење од десет години кој важи до 2030. Пасошото во името нема Северна. Како граѓанин, сум ја завршил таа обврска, до 2030. Никој не ме праша, дали сакам да и се смени името на државата и на мојата важечка патна исправа. Односно прашаа и добија одговор од граѓаните не, но решија да го игнорираат заради стратегиски цели. Се заврши работата, се самопониживме, ама има ли крај на тоа понижување на граѓаните?
Зошто МВР веднаш не почна да издава пасоши, лични карти и возачки дозволи Северна Македонија? Зошто важечките едноставно не ги замени и не ни ги испрати по пошта новите, имаат податоци, досега барем десет пати ни имаат земено отисок од прст и ни ги знаат адресите. Имаа шест години. Конечно, не издаваат нови, заменуваат владини документи. Освен тоа, замената на документите бездруго не смееше да биде на товар на граѓаните, кои еднаш платиле за таа услуга од државата. Но, ај што граѓаните плаќаат по втор пат, многумина и прескапо за да добијат пасош по итна постапка, затоа што по редовен термин, ви закажуваат термин од октомври натаму, недостоинствено се чека во редици по неколку часа и тоа на два пати, и за сликање и земање отисок од прст, и за лично подигање на патната исправа. Како намерно да сакаат да ги истормозат и допонижат до крајни граници сопствените граѓани.
Има ли министерот за внатрешни работи Оливер Спасовски малку срам? Му побегна од државата во Будимпешта Никола Груевски пред очите на целата негова полиција. И тогаш не даде политичка оставка, туку формираа некакви комисии за наводно да се утврдела вината. Човекот по таков скандал, за кој нема цивилизирана држава во светот во која нема да поднесете оставка после таква афера, не само што е уште министер за внатрешни работи, туку неговото име, постојано се споменува и за претседателски кандидат на СДСМ. Бесрамно !
Ова со гужвите пред шалтерите на МВР, малтретирањето и понижувањето на граѓаните и епилогот, по 12 февруари половина од македонските граѓани да бидат заробени како овци во трло и да не можат да излезат од државата, исто не е причина за срам и за оставка. Секако од мај нема да бидат на власт, па барем да дадеше оставка три месеци пред истек на мандатот, за малку од малку да покажеа дека имаат образ. Не дај боже. Во Македонија политичар од фотелја може да го кренете само со багер !
Министерот за надворешни работи Бујар Османи е посебна приказна. Тој како министер и МНР немаат сработено ништо од областа на дипломатијата и надворешната политика, и ја урнисаа македонската дипломатија до непрепознатливи нивоа на сервилност и долност. Него го интерсира само ПР, ивенти, настани, сликања и давање празни фрази во јавност. А да, и да му преведува на Али Ахмети кога партискиот лидер дава изјава во мала Речица. Не знам дали има друг пример во свет шеф на дипломатија да биде преведувач на партиски лидер !
Се разбира Османи и во овој случај со пасошите ништо не сработи. Ниту се контактирани Грците на време, за да се бара од Атина пролонгирање на роковите, ниту пак го интересира понижувањето на неговите граѓани. Тој и неговите си имаат обезбедено дипломатски пасоши, белки нема да му ја мисли за обичните луѓе !
А оној човек што се одзива на името премиер ниту бара, ниту има намера да побара одговорност од било кој министер. Ваква неспособна, некомпетентна, а самозамислена влада досега немало. И иако, како што минува времето, во Македонија владите стануваат се полоши, навистина ќе биде тешко некоја идна влада да ја надмине оваа според некомпетентност. Седум години немаат шајка заковано. 10 километри автопат до Блаце не можат да направат, а камо ли 60 километри пат Охрид-Кичево. Бидејќи немаат срам да се соочат со некомпетентноста и тоа што ништо не направија, а во државата е се полошо, ќе продаваат флоскули за некаков европски фронт. Нема друга држава во Европа каде што половина од граѓаните се заробени дома без патна исправа, не по нивна вина. И нема ни да има ! Може да продаваат само фронт за неспособност со тапија!
Слични новости
Либералната демократија се проголтува самата себе
Ако во еден момент престанат разликите меѓу политиките на САД, наспроти Кина или Русија, западните вредности, како демократијата, владеењето на правото, човековите права, слободата на говорот, ќе бидат крајно загрозени, или сосема ќе исчезнат.
Победата на Трамп и кризата на традиционалните медиуми
Кампањата на Трамп не беше фокусирана дури ни кај традиционалните медиуми кои го поддржуваат како медиумите на Руперт Мардок. Очигледно е дека Трамп и неговите советници за кампања и медиуми подобро и повеќе знаеја која е Америка, што гледа и што слуша, откако нивната стратегија доби јасна верификација со изборниот резултат.
Силата на новата десница
Можеби најзначајно од се во идеолошка смисла, е паѓањето, или барем поместувањето на таканаречениот „санитарен кордон“ околу есктремната десница.