Ниту еден од четворицата кандидати за претседател на Грција не ги доби потребните минимум 180 гласа при денешното трето гласање во Парламентот, а следното, кое се очекува да биде и клучно, ќе се одржи по пауза од пет дена, односно следната среда.
Гласањето е јавно со прозивање на секој од пратениците кои имаат две опции: или да одберат еден од кандидатите или да изјават дека се воздржани.
Четворицата кандидати добија идентичен број гласови како и при првите две гласања одржани на 25 и 31 јануари, а и денеска воздржани беа 52 пратеници.
Константинос Тасулас, кој до неодамна беше претседател на Парламентот, како предлог од владејачката Нова демократија повторно доби 160 гласа. За поранешната пратеничка и министерка од ПАСОК Лука Кацели предлог од СИРИЗА и денеска гласаа 40 пратеници. Поранешниот министер и професор Тасос Јаницис предложен од ПАСОК, доби 34 гласа. За писателот Костас Кирјаку предлог на партијата Победа гласаа повторно 14 пратеници.
При првите две гласања потребно беше двотретински мнозинство, додека пак денеска за избор на шеф на државата неопходно беше еден од кандидатите да добие три петтини, односно 180 од вкупно 300 пратеници, што не беше постигнато, а гласањето ќе се повтори на 12 февруари.
Тогаш ќе биде потребно мнозинство од вкупниот број пратеници, односно најмалку 151 глас, а според резултатите од трите гласања, се очекува Грција следната среда да добие нов претседател и Константинос Тасулас да биде избран за шеф на државата со поддршка од околу 160 пратеници.
Петгодишниот мандат на актуелната претседателка Катерина Сакеларопулу завршува на 13. март годинава.
Слични новости
Мицотакис: Потребно е Европа да се разбуди од геополитичката и економската летаргија
За жал, неодамнешните случувања и овој различен поглед на работите од САД веќе нè обврзуваат,не само да се соочиме со вистината, туку да се движиме со многу голема брзина и да ги спроведеме одлуките за кои долго разговараме, посочи грчкиот премиер Кирјакос Мицотакис за време на неговото учество на „Thessaloniki Summit“.
Додик: Обвинителството на БиХ ја нападна институцијата претседател и институциите на Република Српска
Претседателот на Република Српска (РС) Милорад Додик денеска пред Судот на Босна и Херцеговина во Сараево изјави дека Обвинителството на БиХ, со покренување постапка против него, ја нападнало институцијата претседател и институциите на РС
Околу 7.000 лица лани биле депортирани од Грција или доброволно вратени во нивните земји
Минатата година околу 7.000 лица кои не добиле азил во Грција биле депортирани или доброволно вратени во нивните земји, додека, пак, од јануари биле вратени над 500 лица, информираше во средат министерот за миграција и азил Никос Панајотопулос