Изминатата ноќ во дискотеката „Пулс“ во Кочани избувнал пожар во кој, според информации на Министерството за внатрешни работи за медиумите, има најмалку 50 загинати.
Бројот на повредени лица засега се уште не се знае и допрва се утврдува. Дел од повредените се префрлени во штипската и во скопските клиники. Официјални податоци за тоа како настанал пожарот и кои се причините се уште нема.
Како што известуваат локалните медиуми, причина за ширење на пламените јазици во дискотеката биле употребени пиротехнички средства, настап имала македонската група ДНК. Во моментот на избувнувањето и ширењето на пожарот, дискотеката била полна со луѓе.
Локалните медиуми пренесуваат дека по избувнувањето на пожарот, пристигнале голем број противпожарни бригади, амбулантни возила и брза помош и полициско присуство.
Утринава, присутните пред дискотеката во Кочани во очај ги бараат своите блиски. Бараат информации оти никој не знае дали се живи или мртви.
„Ја барам внука ми. Внатре не пуштаат да се влезе, а ние не знаеме каде е. Телефонот и ѕвони, таа не се јавува. Бевме во болницата во Кочани, во Штип, некои се пратени во Скопје. Можеби е повредена и не може да се јави. Мора некој нешто да ни каже итно, каде да бараме“, изјави соговорник на РСЕ од Кочани.
Директорот на Центарот за управување со кризи, Стојанче Ангелов информира дека веќе се наоѓа во Кочани, заедно со министерот за внатрешни работи Панче Тошковски и директорот на Бирото за јавна безбедност Александар Јанев. Тој најави дополнителни информации за подоцна.
Се огласија и од Обвинителството, од каде велат дека точниот број на жртви и повредени допрва ќе се утврдува.
„Сите надлежни служби, вклучително и јавен обвинител од ОЈО Кочани се на терен. Бројот на жртви и повредени се утврдува. Се уште се преземаат дејствија и се врши увид. Јавниот обвинител на РСМ, како и основните јавни обвинители на ОЈО Скопје и на организиран криминал се на пат кон Кочани. На кочанското обвинителство ќе му бидат на располагање сите капацитети на обвинителствата за итно постапување“, соопштија од ОЈО.
Слични новости
Агелер: Нашите срца се скршени, благодарна сум на земјите од регионот за веднаш дадената помош
Нашите срца се скршени, благодарна сум на земјите од регионот за веднаш дадената помош, изјави американската амбасадорка во земјава Анџела Агелер, по потпишувањето во Книгата на жалост поради загинувањето на 59 лица во Кочани
Рокас: Тука сме со поддршка како ваши партнери од првиот миг, да се поддржуваме меѓусебе во вакви тешки мигови
Евроамбасадорот Михалис Рокас денеска изјави дека ЕУ како партнер на Македонија е тука со поддршка и помош од првиот миг на трагедијата што се случи во Кочани, во која животот го изгубија 59 лица, а 155 се повредени
Кочани: Демолирано кафулето на сопственикот на опожарената дискотека
Група граѓани во Кочани го демолираа кафе барот „Класик“ чиј сопственик е истиот од дискотеката каде во пожар загинаа 59 лица, јави дописникот на МИА.