Најмалку 12 лица загинаа во земјотресот со јачина од 7,7 степени според Рихтеровата скала што во петокот го погоди Мјанмар, изјави за Reuters министерот за надворешни работи во сенка на Мјанмар, апелирајќи за итна помош од меѓународната заедница.
Зин Мар Аунг, главен дипломат на паралелната влада на национално единство, рече дека хуманитарната помош ќе биде обезбедена од милицијата против хунтата, Силите за народна одбрана.
„Ситуацијата е многу сериозна, потребна ни е хуманитарна и техничка помош од меѓународната заедница“, рече тој во телефонското интервју, додавајќи дека комуникациите се голем предизвик со оглед на тоа што хунтата го ограничи интернетот во тешко погодените области.
И мјанмарската хунта во петокот упати меѓународен апел за помош и прогласи вонредна состојба во шест региони поради големите штети.
Водачот на Хунтата, Мин Аунг Хлаинг, ја посети болницата во главниот град Најпидав, каде што се лекуваат многу од жртвите, пренесе AFP.
„Сакаме меѓународната заедница да испрати хуманитарна помош што е можно поскоро“, изјави портпаролот на хунтата Зав Мин Тун за AFP во болницата.
Вонредната состојба се однесува на најтешко погодените региони: Сагаинг, Мандалеј, Магвеј, потоа североисточен Шан, Најпидав и Баго, се вели во соопштението за печатот.
Властите не го објавија бројот на жртвите, но фактот дека воената влада, изолирана по државниот удар во февруари 2021 година, апелира за помош, сугерира дека ова може да биде катастрофа од големи размери.
Плиткиот земјотрес со јачина од 7,7 степени според Рихтеровата скала го погоди напладне на 16 километри северозападно од градот Сагаинг во централниот дел на Мјанмар, по што неколку минути подоцна следеше последователен потрес со јачина од 6,4 степени според Рихтер, соопшти Американскиот геолошки институт (USGS).
Потресите биле почувствувани дури до главниот град на Тајланд, Бангкок, на околу илјада километри. Кинеската новинска агенција Ксинхуа објави дека силни потреси се почувствувани во југозападната кинеска провинција Јунан, која граничи со Мјанмар, но дека нема жртви.
Земјотресите се релативно чести во Мјанмар, каде што шест земјотреси со јачина од 7 или повисоки се случиле помеѓу 1930 и 1956 година во близина на раседот Сагаинг, кој поминува од север кон југ низ центарот на земјата.
Во 2016 година, земјотрес со јачина од 6,8 степени според Рихтеровата скала го погоди древниот главен град Баган во централниот дел на земјата, при што загинаа три лица и предизвика уривање на ѕидовите на храмот во туристичката дестинација. Во ноември 2012 година, земјотрес со јачина од 6,8 степени според Рихтеровата скала го погоди централниот дел на земјата, при што загинаа 26 лица, а стотици беа повредени.
Лошата инфраструктура, несоодветните здравствени услуги, особено во руралните средини и неконтролираниот урбан развој го направија населението во населените места особено ранливо на природни катастрофи, велат експертите.
Слични новости
Премиерот на Гренланд порача дека САД нема да го преземат островот
Соединетите држави нема да го преземат Гренланд, објави премиерот Јенс-Фредерик Нилсен во објава на Faceebok како одговор на изјавите на американскиот претседател Доналд Трамп
Трамп се закани со „бомбардирање“ на Иран доколку не се постигне нуклеарен договор
Американскиот претседател Доналд Трамп во неделата му се закани на Иран со бомбардирање и секундарни царини доколку Техеран не постигне договор со Вашингтон за неговата нуклеарна програма
Трамп најави секундарни царини за руската нафта доколку не дојде до договор за Украина
Американскиот претседател Доналд Трамп изјави во неделата дека ќе воведе секундарни царини во износ од 25 до 50 отсто на целата руска нафта доколку почувствува дека Москва ги кочи неговите напори за завршување на војната во Украина