Најавата за средбата Трамп-Си го поттикна Волстрит

Трговските тензии меѓу двете најголеми економии во светот се зголемуваат веќе некое време, а Трамп во последните денови изјави дека очекува успешна средба со Си, но и дека средбата можеби воопшто нема да се случи. Потврдата од Белата куќа дека средбата ќе се одржи на крајот од следната седмица ги зголеми надежите на инвеститорите за ублажување на трговските тензии.

„Јасно е дека потврдата за средбата меѓу Трамп и Си е позитивна за пазарот, кој во последните денови оди малку нагоре, малку надолу поради трговските тензии“, смета Закари Хил, портфолио менаџер во комапнијата „Horizon Investments“.

Инвеститорите се фокусираа и на кварталните деловни извештаи на компаниите. Повеќето од нив постигнуваат подобри од очекуваните резултати, но има и потфрлања.

Вчера, цената на „Tesla“ првично падна за околу 3 отсто откако производителот на електрични автомобили објави пониска од очекуваната добивка, но до крајот на тргувањето, цената на „Tesla“ порасна за повеќе од 2 отсто.

Повеќе од 120 компании во индексот S&P 500 досега објавија резултати, при што 86 отсто од нив објавија заработка поголема од очекуваната.

Затоа аналитичарите во анкетата на Reuters сега проценуваат дека заработката на компаниите од S&P 500 во третиот квартал се зголемила за 9,9 отсто во однос на претходната година, во споредба со зголемувањето од 8,8 отсто на почетокот на сезоната за финансиско известување.

Цените на акциите, исто така, пораснаа на европските берзи вчера. Лондонскиот индекс FTSE доби 0,67 отсто, на 9.578 поени, додека франкфуртскиот DAX порасна за 0,23 отсто, на 24.207 поени, а парискиот CAC за 0,23 отсто, на 8.225 поени.