Цените на нафтата во вторникот се искачија на 77 долари на меѓународните пазари, како одраз на стравувањата на трговците дека американските санкции против Иран и Русија значително ќе ја намалат понудата.
На лондонскиот пазар цената на барелот попладнето беше за 1,20 долари повисока од вчерашното затворање на тргувањето, на 77,06 долари. Речиси за исто толку порасна цената на барелот на американскиот пазар каде се тргуваше по 73,43 долари.
Организацијата на земјите извознички на нафта (OPEC) засебно објави дека барелот од референтната кошничка нафта на нејзините членки во понеделникот поскапел за 51 цент на 77,22 долари.
Пазарите се фокусираа на американските санкции за руската и иранската нафта на почетокот од седмицата. Поранешниот американски претседател Џо Бајден кон крајот на својот мандат воведе санкции за превозниците, осигурителите и производителите на руска нафта, што ја науши нејзината испорака во Кина и Индија, што предизвика пораст на цените на транспортот. Новиот кабинет под раководство на Доналд Трамп го зголеми притисокот врз Иран минатата седмица со нови санкции за превозниците кои транспортираат нафта во Кина.
Намалената понуда се совпадна со зголемената побарувачка за поевтино гориво поради поскапувањето на бензинот. Во такви услови новите американски царини паднаа во втор план.
Трамп во понеделникот објави дека, со цел да и помогне на домашната индустрија, ќе стави крај на сите олеснувања на 12. март и ќе воведе дополнителни царини од 25 отсто за увоз на челик и алуминиум од ЕУ, Канада, Бразил, Мексико, Јужна Кореја, Аргентина, Австралија, Бразил, Јапонија и Обединетото Кралство.
САД веќе воведоа царини за увозот од Кина, а Пекинг одговори со давачки за увоз на американски јаглен, течен природен гас и нафта.
Најавените царини и контрацарини би можеле особено да го оптоварат нафтено-интензивниот дел од глобалната економија и да ја доведат во прашање побарувачката, објаснуваат од инвестициската банка „Morgan Stanley“.
Слични новости
Премиерот Мицкоски најави нови 500 милиони евра кредит, наменети за локални и регионални патишта
Премиерот рече дека 500-те милиони евра кредит ќе бидат вложени во реконструкција на локални, регионални и експресни патишта. Ќе се поврзуваат општина со општина со локални и регионални патишта.
Бојан Стојаноски од ВМРО ДПМНЕ најави дека во време на владеење на ВМРО-ДПМНЕ ќе се стави крај на криминалот на Пуцко Петрол
Пуцко Петрол 30 години имал статус на бела мечка во македонското општество, дозволено му било преку тендери да внесува што сака и како сака. Сега, во време на ВМРО-ДПМНЕ, ќе се стави крај на неговото криминогено однесување, порача пратеникот на ВМРО-ДПМНЕ.
Венс: Се очекува договор на високо ниво за ТикТок до 5 април
Тикток се соочи со проблеми во САД откако на 19 јануари стапи во сила закон со кој се бара од сопствениците на Тикток кинеската компанија Бајтденс да го продадат, поради загрозување на американската национална безбеност или во спротивно ќе биде забранет.