Нафтата поевтини кон 62 долари

Вниманието на трговците го преокупираше најновиот месечен извештај на МАЕ за пазарите на нафта. Понудата брзо расте, а побарувачката е пригушена, па затоа вишокот ќе биде поголем од претходно очекуваното, предупреди агенцијата.

Побарувачката треба да се зголеми за 700.000 барели дневно, оваа и следната година, според новите пресметки на МАЕ. Понудата, пак, се очекува да се зголеми за 3 милиона барели дневно во 2025 година и 2,4 милиони барели дневно во 2026 година.

Глобалните залихи во август достигнаа највисоко ниво во четири години од 7,9 милиони барели, пресмета агенцијата. Прелиминарните податоци за септември, исто така, покажаа остро зголемување, првенствено кај барелите складирани на танкери, коишто, благодарение на порастот на испораките од Блискиот исток и Северна и Јужна Америка, акумулираа дури 102 милиони барели нафта, се вели во извештајот.

Трговците се загрижени и од знаците на тензии во трговските односи меѓу САД и Кина. Американскиот претседател Доналд Трамп, треба да се сретне со својот кинески колега Си Џинпинг во Јужна Кореја и покрај зголемените тензии по заострувањето на контролата на извозот на технологијата на ретки земни метали од страна на Кина.

Кон крајот на минатата седмица, Трамп изјави дека може да ги зголеми царините за кинескиот увоз на 100 отсто и да воведе контрола на извозот на клучниот софтвер за Кина.

Нервозата повторно се зголеми во вторникот откако Пекинг воведе санкции врз групата американски подружници на јужнокорејската бродоградежна компанија „Hahwha Ocean“.

„Американските подружници на Hahwha Ocean им помогнаа и ги поддржаа истрагите и мерките на американската влада против поморскиот, логистичкиот и бродоградбениот сектор на Кина. Кина е многу незадоволна и силно се спротивставува на (тие дејствија)“, соопшти кинеското Министерство за трговија во вторникот.

Поострите тонови во американско-кинеските односи повторно ги поттикнаа стравувањата од забавување на економската активност и побарувачката за енергетски производи.