Свеченост по повод примопредавањето на должноста командант на Командата за операции (КО) се одржа денеска во кумановската касарна „Боро Менков“. Врз основа на Укази на претседателката и врховен командант на Армијата, Гордана Сиљановска Давкова, должноста командант на КО од бригаден генерал Бесник Емини ја прими бригаден генерал Мирче Ѓоргоски.
Бригадниот генерал Ѓоргоски досега ја извршуваше должноста началник на штаб во Командата за операции, а отсега ќе раководи со најголемата оперативна команда во Армијата, додека бригадниот генерал Бесник Емини кој беше на оваа должност од јуни 2021 година, во иднина ќе ја извршува должноста државен советник за политика и планирање во Директоратот за политика и планирање, кризен менаџмент и цивилно-воена соработка во Министерството за одбрана.
Во своето обраќање началникот на Генералштабот на Армијата, генерал-мајор Сашко Лафчиски, истакна да се биде на чело на оваа команда, која го зазема најважното место во одбраната на суверенитетот и интегритетот на татковината, е вистински предизвик, огромна привилегија и чест, но и огромна одговорност. На досегашниот командант му изрази благодарност за неговото посветено и професионално командување и раководење со КО, истовремено изразувајќи уверување дека новопоставениот командант со своето искуство и војничка кариера ќе продолжи со успех да ја води КО.
Генералот Емини во својот говор изрази благодарност до припадниците на КО за нивниот висок професионализам, труд, залагање и резултати, кои го направија да биде горд командант. Генералот изрази и благодарност за досегашната професионална соработка до Генералштабот на Армијата, Министерството за одбрана, акредитираните аташеи на НАТО земјите и Канцеларијата за одбранбена соработка на САД. Обраќајќи се до припадниците на КО им порача да продолжат со успешно извршување на нивните обврски и задачи бидејќи само со чесна посветеност, личен интегритет и храброст можат успешно да придонесат во градењето на ликот на современ воин на нашата Армија.
Новопоставениот командант, бригаден генерал Мирче Ѓоргоски, во своето обраќање изрази благодарност за довербата која му е дадена да командува со КО. На досегашниот командант му оддаде признание за покажаното лидерство, умешноста во командувањето и пренесувањето на искуството на помладите со кои имал повеќе пати непосредна соработка во текот на досегашното работење. Генералот Ѓоргоски во своето обраќање најави дел од приоритетните задачи кои што следуваат, вклучително и модернизацијата на Армијата, која е најголема во историјата на нашата Армија и бара максимално ангажирање, а при која ќе го употреби сиот свој капацитет и знаење.
На денешната свеченост покрај началникот на Генералштабот, генерал-мајор Сашко Лафчиски присуствуваа и заменикот на началникот на Генералштабот, генерал-мајор Азим Нуредин, директорот на Генералштабот, бригаден генерал Орце Јордев, генерали во Армијата, пензионирани генерали, поранешни команданти на КО, командантот на Мултинационалната бригада на Југоисточна Европа (СЕЕБРИГ), воено-дипломатскиот кор, градоначалници од зоната на одговорност, претставници од локалната самоуправа и останати гости.
Слични новости
ССМ најавува протести доколку Владата не ги зголеми платите
Сојузот на синдикати на Македонија најавува протести во април доколку не се постигне договор за зголемување на платите. Претседателот на ССМ Слободан Трендафилов денеска на прес-конференција најостро ги осуди политичките напади врз синдикатот и рече дека нема да дозволат работничката класа да се става во подредена положба.
Студенти од ФИНКИ ќе му помагаат на МОН во унапредување на дигиталното работење и дигитализацијата на образованието
Студенти од Факултетот за информатички науки и компјутерско инженерство (ФИНКИ) ќе му помагаат на Министерството за образование и наука во унапредување на дигиталното работење и забрзување на процесот на дигитализација на образованието, за што денеска Меморандум за соработка потпишаа министерката Весна Јаневска и деканот на ФИНКИ Боро Јакимовски
Филков од Љубљана: Сега е моментот кога ЕУ мора да покаже вистинско лидерство и политичка волја на патот на интеграцијата на Западен Балкан
Пред нас е важен период кога мораме да покажеме политичка волја, лидерство и посветеност за спроведување на сите овие реформи. Европската Унија и нејзините институции треба да продолжат да ја поддржуваат оваа амбиција, да покажат лидерство во решавањето на билатералните и регионалните проблеми, и да ја продолжат својата поддршка на патот на интеграцијата на Западниот Балкан, истакна министерот за правда Игор Филков