Маск најави завршување на планираните кратења на федералните трошоци за неколку седмици

Маск, најбогатиот човек на светот, беше назначен од Белата куќа за „специјален вработен во владата“, што го ограничува неговиот мандат на 130 дена, што значи дека неговото раководство во операциите на DOGE би можело да заврши најрано на крајот од мај.

„Мислам дека ќе направиме поголем дел од работата потребна за да го намалиме дефицитот за трилион долари во таа временска рамка. Владата е неефикасна и има многу расипништво и измами, така што уверени сме дека намалувањето од 15 проценти може да се направи без да се влијае на некоја од критичните државни служби“, рече Маск.

DOGE проценува дека веќе со остварените кастрења од 24 март им заштедил на американските даночни обврзници 115 милијарди долари, преку мерки кои вклучуваат намалување на вработените, продажба на средства и откажување на договори со државата.

Меѓутоа, вкупните заштеди пријавени на веб-страницата на DOGE не се проверливи и неговите пресметки се преполни со грешки и корекции, според Reuters. Експертите за буџет, сепак, велат за агенцијата дека Маск не може да ја постигне својата цел за намалување на трошоците без да навлегува во програмите за права, како што е социјалното осигурување, за кои Трамп вети дека нема да ги намалува.

Интервјуто на Fox News го одбележа првиот пат кога Маск и неговиот тим во DOGE се сретнаа со медиумите за да објаснат што прават. На Маск му се придружија уште седум директори на DOGE, вклучувајќи го Стив Дејвис, претседател на компанијата за градење тунели на Маск „The Boring Company“, и Џо Гебија, ко-основач на „Airbnb“.

„Доколлку оваа вежба не биде успешна, американскиот брод ќе потоне. Затоа го правиме тоа“, рече Маск, кој е и извршен директор на производителот на електрични автомобили „Tesla“.

Улогата на Маск во намалувањето на бројот на вработените во администрацијата и сојузните агенции предизвика политички реакции последниве седмици, при што автомобилите и дилерите на „Tesla“ беа погодени од бран вандализам и со употреба на огнено оружје и со опожарување на возилата, како и протести низ целата земја.