Франција ќе им помогне на Палестинската самоуправа да изготви устав за идната држава, изјави францускиот претседател Емануел Макрон во вторникот вечерта по средбата со претедателот на Палестинската самоуправа, Махмуд Абас во Париз.
Голем број западни земји, вклучувајќи ја и Франција, формално ја признаа палестинската држава во септември, потег поттикнат од фрустрацијата кон Израел поради разорната војна во Газа и желбата да се промовира решение за две држави за блискоисточниот конфликт.
Примирјето меѓу Израел и Хамас, постигнато со посредство на САД, стапи на сила во октомври, но Израел повторно ја отфрли секоја можност за палестинска државност.
Макрон рече дека Франција и Палестинската самоуправа, која има ограничена самоуправа под израелска воена окупација на Западниот брег, ќе формираат заеднички комитет за изготвување нов палестински устав.
„Овој комитет ќе биде одговорен за работа на сите правни аспекти: уставни, институционални и организациски“, изјави францускиот претседател пред новинарите.
„Ова ќе придонесе за создавање нов устав, чиј нацрт ми го презентираше претседателот Абас, а целта ќе биде да се финализираат сите услови за таква држава Палестина“, рече Макрон.
Додаде дека Франција ќе донира 100 милиони евра хуманитарна помош за Газа оваа година.
Абас ја нагласи посветеноста на „култура на дијалог и мир“. „Сакаме демократска, разоружана држава посветена на владеењето на правото, транспарентноста, правдата, плурализмот и ротацијата на власта“, рече Абас.
Рече и дека ги цени напорите на американскиот претседател Доналд Трамп и глобалните партнери за прекин на борбите во Газа и постигнување на следната фаза кон траен мир со разоружување на милитантните групи, вклучително и Хамас.
Одлуките на Франција, Велика Британија, Канада и Австралија да признаат палестинска држава ги доведоа во линија со повеќе од 140 земји кои исто така ги поддржуваат палестинските аспирации за создавање независна татковина на територија под израелска окупација.
Но, американскиот претседател Доналд Трамп го осуди бранот признавања, повторувајќи го ставот на блискиот сојузник Израел дека тоа го „наградува“ Хамас за нападот врз Израел на 7 октомври 2023 година, со кој започна војната во Газа.
Слични новости
Трамп ја изостави Северна Кореја во својата безбедносна стратегија, можно обновување на дипломатијата
Новиот план на американскиот претседател Доналд Трамп за глобална безбедност повеќе не вклучува денуклеаризација на Северна Кореја, што ги поттикнува шпекулациите дека Вашингтон се стреми да ги зголеми шансите за дипломатски напредок со Пјонгјанг во 2026 година
Маск ја спореди ЕУ со нацистите, X го затвори рекламниот профил на ЕК
Два дена откако Европската унија изрече голема казна на платформата X, социјалната мрежа ја затвори својата рекламна сметка на Европската комисија, а сопственикот Илон Маск ја спореди Унијата со нацистичка Германија
Нетанјаху: Израел ќе остане во тампон-зоната во јужна Сирија
Израел има намера да остане во тампон-зоната во јужна Сирија, изјави премиерот Бенјамин Нетанјаху на состанокот со израелските амбасадори, според извештаите на локалните медиуми